ನಿತ್ಯ ಶುಭಮಂಗಳಂ ಪ
ಜಗದೇಕ ವೀರನಿಗೆ ಜಗದುದರ ದೇವನಿಗೆ
ಜಗವ ಬಾಯೊಳು ತೋರ್ದ ಮಹಮಹಿಮಗೆ
ಜಗವ ಸೃಜಿಸಿದ ಹರಿಗೆ ಜಗವಪಾಲಿಪದೊರೆಗೆ
ಜಗವ ಸಂಹರಿಸುವಗೆ ಜಯ ಮಂಗಳಂ ಅ.ಪ
ವರಮುನಿಯ ತಾಡನದಿ ಹೊರಡೆ ಲಕ್ಷ್ಮಿಯು ಆಗ
ಗಿರಿಗಿಳಿದು ಬಂದು ಹುತ್ತದೊಳಗಿರಲು
ಪರಮೇಷ್ಠಿ ಅರಸಿಪಾಲ್ಗರಿಯೆ ಗೋಪಾಲಕನ
ವರಕುಠಾರದ ಪೆಟ್ಟಿಗಂಜಿ ನಟಿಸಿದವಗೆ 1
ಗಿರಿಗಿರಿಯ ಸಂಚರಿಸಿ ಅಡವಿಮೃಗ ಬೆನ್ನಟ್ಟಿ
ಪರಮಪದ್ಮಾವತಿಯ ಮನದಿ ಕಂಡು
ದುರುಳ ಮಾತುಗಳಾಡಿ ಶಿಲೆಯತಾಡಿತನಾಗಿ
ಕೊರವಂಜಿ ರೂಪದಿಂ ಕಣಿಯ ಹೇಳಿದಗೆ 2
ಆಕಾಶರಾಜನಿಗೆ ಅಳಿಯನೆನಸಿಕೊಂಡು
ಆಕೆ ಪದ್ಮಾವತಿಯ ಕೂಡಿದವ
ಬೇಕಾದ ವರಗಳನು ಕೊಡುತ ಭಕ್ತರ ಪೊರೆವಶ್ರೀಕಾಂತ ಕಮಲನಾಭವಿಠ್ಠಲಗೆ 3

ಬಂದರು ನಾರದರ್ಹರುಷದಲಿ
ನಿಂದು ಯಜ್ಞ ನೋಡುತ ಮುದದಿ
ಇಂದು ಯಾರಿಗರ್ಪಣೆ ಮಾಡುವಿರೆನೆ
ಬಂದಿತು ಸಂಶಯ ಋಷಿಗಳಿಗೆ
ಮಂಗಳಂ ಜಯ ಮಂಗಳಂ ಪ
ತ್ವರದಿಭೃಗು ಮುನಿಗಳು ಹೊರಡುತಲಿ
ಹರಬ್ರಹ್ಮರು ಸರಿಯಲ್ಲೆನುತ
ಹರಿವೈಕುಂಠದಿ ಮಲಗಿರೆ ನೋಡುತ
ಭರದಿಂದೊದೆಯೆ ವಕ್ಷಸ್ಥಳಕೆ
ಮಂಗಳಂ ಜಯ ಮಂಗಳಂ 1
ನೊಂದಿತು ಪಾದವೆಂದುಪಚರಿಸೆ
ಇಂದಿರಾದೇವಿ ಕೋಪಿಸಿ ತೆರಳೆ
ಬಂದು ಋಷಿಗಳಿಗರುಹಿದರು ಶ್ರೀಗೋ-
ವಿಂದಗೆ ಸಮರಿಲ್ಲೆಂದೆನುತಾ
ಮಂಗಳಂ ಜಯ ಮಂಗಳಂ 2
ಮಡದಿ ಇಲ್ಲದೆ ಬೇಸರ ಪಡುತಾ
ಪೊಡವಿಗಿಳಿದು ಹುತ್ತದೊಳಗಿರಲು
ಕೊಡಲಿಯ ಗಾಯಕೌಷಧ ಹುಡುಕುತ ಹರಿ
ಅಡವಿಗಳಲಿ ಸಂಚರಿಸಿದಗೆ
ಮಂಗಳಂ ಜಯ ಮಂಗಳಂ3
ಭೂಮಿಗೊಡೆಯ ವರಹನನು ನೋಡಿ
ಕಾಮಿನಿ ಬಕುಳೆ ಸೇವೆಗೆ ಮಾಡಿ
ಕಾಮಜನಕ ಬೇಟೆಗೆ ಹೊರಟನು ಬಹು
ಪ್ರೇಮದಿಂದಲಂಕರಿಸಿದ ಹರಿಗೆ
ಮಂಗಳಂ ಜಯ ಮಂಗಳಂ4
ವನವನ ಚರಿಸಿ ಸ್ತ್ರೀಯರ ನೋಡಿ
ವನಜಾಕ್ಷೇರು ನಡುಗುತ ಭಯದಿ
ಘನಮಹಿಮಗೆ ಕಲ್ಲು ಕಲ್ಲೆಸೆಯೆ ಹಯ
ವನದಿ ಮೃತಿಸೆ ಗಿರಿ ಏರಿದಗೆÉ
ಮಂಗಳಂ ಜಯ ಮಂಗಳಂ 5
ಕಾಮಿನಿ ಬಕುಳೆಗೆಲ್ಲವ ಪೇಳಿ
ಕೋಮಲೆ ಕೊರವಿ ರೂಪವ ತಾಳಿ
ವ್ಯೋಮರಾಜನ ಪುರದಲಿ ಧರಣಿಗೆ
ಸಾಮುದ್ರಿಕೆ ಪೇಳಿದ ಹರಿಗೆ
ಮಂಗಳಂ ಜಯ ಮಂಗಳಂ 6
ವಶಿಷ್ಟ ಕಶ್ಯಪರು ಶುಕರುಗಳು
ವಿಶಿಷ್ಟ ಬಂಧುಗಳ ಕರೆಸುತಲಿ
ಪಟ್ಟದರಸಿ ಲಕುಮಿಯು ಬರೆಹರುಷದಲಿ
ಕಟ್ಟಿ ಮಾಂಗಲ್ಯ ಹರಿ ಪದ್ಮಿನಿಗೆ
ಮಂಗಳಂ ಜಯ ಮಂಗಳಂ 7
ಜಯ ಜಯ ವೆಂಕಟ ಪದ್ಮಿನಿಗೆ
ಜಯ ಜಯ ಪದ್ಮಾವತಿಪ್ರಿಯಗೆ
ಜಯ ಜಯ ಕಮಲನಾಭ ವಿಠ್ಠಲಗೆ
ಜಯ ಜಯ ಶ್ರೀ ಶ್ರೀನಿವಾಸನಿಗೆಮಂಗಳಂ ಜಯ ಮಂಗಳಂ 8