ಜಯಮಂಗಳಂ ಶುಭೋದಯ ಮಂಗಳಂ
ಜಯ ಕಕುದ್ಗಿರಿ ಗಂಗಾಧರ ಲಿಂಗಗೆ ಪ
ಜಡೆಯುಡುಪತಿಯು ಗಂಗೆಯೊಡಗೂಡ್ದ ಮಸ್ತಕಕೆ
ಮಡುಹಿ ಮಾರನ ಭಸಿತದಾಳ್ದ ಪಣೆಗೆ
ಪೆಡೆಯೆತ್ತಿ ಗಾನಗೈವಹಿ ಕುಂಡಲಂಗಳಿಗೆ
ದೃಢಭಕತರಿಷ್ಟದಾಯಕ ಶಿವನಿಗೆ 1
ಸೋಮಸೂರ್ಯಾಗ್ನಿ ಲೋಚನೆಗೆ ವಿಷದಾಳಿ ಸುರ
ಸ್ತೋಮವನು ಕಾಯ್ದ ಶೋಭನ ಕಂಠಕೆ
ಭೀಮನಿಗೆ ಭಯಹರಗೆ ಪರಶುಮೃಗ ಹಸ್ತನಿಗೆ
ಕಾಮಿತಾರ್ಥದ ವರಾಭಯ ಕರನಿಗೆ 2
ನಾಗಕಂಕಣಧರಗೆ ನಾಗೋತ್ತರೀಯನಿಗೆ
ನಾಗಯಜ್ಞೋಪವೀತವ ತಾಳ್ದಗೆ
ನಾಗಚರ್ಮಾಂಬರಗೆ ನಗರಾಜ ಚಾಪನಿಗೆ
ಗಮನ ಬಾಣಗೆ ಶಿವನಿಗೆ 3
ಗಿರಿಜೆಗರ್ಧಾಂಗವನ್ನಿತ್ತ ಶುಭವಿಗ್ರಹಗೆ
ವರ ವೃಷಭವನ್ನೇರಿ ಸಂಚರಿಪಗೆ
ಬರೆದುಂಗುಟದಿ ಹೊಳೆದ ಚಕ್ರದಿಂ ದೈತ್ಯಕುಲ
ಹರಣ ವರದಾಯಕಗೆ ಸರ್ವೆಶಗೆ 4
ತಿರುಪತಿಯ ವಾಸವನು ದೃಢಗೈದು ಕಕುದ್ಗಿರಿಯ
ಪರಮ ಕ್ಷೇತ್ರದಿ ಮಹಿಮೆಗಳ ತೋರ್ಪಗೆ
ವರದ ವೆಂಕಟಪತಿಗೆ ಗಂಗಾಧರೇಶ್ವರಗೆ
ಶರಣಾಗತರ ಕಾಯ್ವ ಸಾಂಬಶಿವಗೆ 5

ಮಂಗಳಂ ಜಯ ಮಂಗಳಂ
ಮಂಗಳಂ ಬೆಟ್ಟದೊಡೆಯ ಹರಿಗೆ ಜಯ ಪ.
ಮಂಗಳಂ ಕೊಳಲನೂದುವ ದೊರೆಗೆ
ಮಂಗಳಂ ಶ್ರೀ ಶ್ರೀನಿವಾಸ ವೆಂಕಟನಿಗೆ
ಮಂಗಳಂ ಶೇಷಾಚಲ ಹರಿಗೆ ಅ.ಪ.
ವೈಕುಂಠದಲಿ ಬಂದವಗೆ
ಆ ಕೋಲಗಿರಿಯಲಿ ನಿಂದವಗೆ
ತಾ ಕಾಸುಕಾಸಿಗೆ ಬಡ್ಡಿಯ ಕೊಳುತಲಿ
ಬೇಕಾದ ವರಗಳ ಕೊಡುವನಿಗೆ 1
ಬುತ್ತಿ ಪೊಂಗಲುಗಳ ಮಾರುವಗೆ
ಮತ್ತೆ ದರ್ಶನ ಕೊಡದೆ ಒದೆಸುವಗೆ
ನಿತ್ಯ ಸ್ವಾಮಿಪುಷ್ಕರಣಿ ತೀರದಿ ನಿಂತು
ಭೃತ್ಯವರ್ಗಗಳನು ಪೊರೆವವಗೆ 2
ಶಂಖ ಚಕ್ರ ವರ ಹಸ್ತನಿಗೆ
ಶಂಕೆಯಿಲ್ಲದೆ ಅಭಯ ಕೊಡುವನಿಗೆ
ಶಂಕರಮಿತ್ರಗೆ ಪರಮಪವಿತ್ರಗೆ
ಸಂಕೋಲೆ ಹನುಮಗ್ಹಾಕಿಸಿದವಗೆ 3
ವೃಂದಾವನದಲಿ ಮೆರೆದವಗೆ
ಮಂದಗಮನೆಯರ ಮೋಹಿಪಗೆ
ಚಂದದ ಪೊಂಗೊಳಲೂದಿ ಗೋಪಿಯರ ಕಾಯ್ದ
ಗೋಪಿ ಕಂದನಿಗೆ 4
ನಾಗರಾಜನ ಗಿರಿ ನಿಲಯನಿಗೆ
ಯೋಗಿಗಳಿಗೆ ನಿಲುಕದ ಹರಿಗೆ
ಸಾಗರನಿಲಯ ಗೋಪಾಲಕೃಷ್ಣವಿಠ್ಠಲ
ಭೋಗಿಶಯನ ಲಕ್ಷ್ಮೀಪತಿಗೆ 5