ಉಗಾಭೋಗ
ಗುರುವಿನ ಕರುಣದಿ ವೈರಾಗ್ಯ ಭಾವವು
ಗುರುವಿನ ಕರುಣದಿ ತತ್ವ ಸಾಧನೆಗಳು
ಗುರುವಿನ ಕರುಣದಿ ಆತ್ಮ ವಿವೇಕಗಳು
ಅಪರೋಕ್ಷ ಪುಟ್ಟಲು
ಗರುವಿಕೆಯನೆ ಬಿಡಿಸಿ ಕರೆದು ಕೊಡುವ ಮುಕ್ತಿ

ಪರಮಾತ್ಮನ ನೆನೆಯಲು ಬೇಕು
ಪರತರಸುಖವನು ಪಡೆಯುವನಿದರಿಂ
ದುರಿತಗಳೆಲ್ಲವ ನೀಗಲು ತಾ ಪ
ಮೊದಲನೆ ಕಾರ್ಯವು ಜೀವರೆಲ್ಲರಿಗೆ
ಇದು ಬಲು ಸುಲಭವು ಸಾಧನಗಳಲೀ
ಪದುಮನಾಭನನು ನೆನೆಯದಿರುವವ
ಅಧಮನು ಜಗದಿ ವ್ಯರ್ಥ ಜೀವಿಸುವ 1
ಎಲ್ಲ ವೇದಗಳು ಎಲ್ಲ ಶಾಸ್ತ್ರಗಳು
ಎಲ್ಲ ಸಾಧನೆಗಳು ಆತನ ಪ್ರಾಪ್ತಿಗೆ
ಬಲ್ಲವರಿಂದಲಿ ತಿಳಿದು ವಿಚಾರಿಸಿ
ನಿಲ್ಲದೆ ಸಾಧನೆ ಕೈಕೊಳ್ಳುವುದು 2
ಕೇಳುವದೈ ಪರಮಾತ್ಮನ ತತ್ವವ
ತಿಳಿವುದು ತನ್ನೊಳು ತಾನೇ ನಿರುತಾ
ಪೇಳಲೇನು ಧ್ಯಾನಿಸುವುದಾತನ
ಮೇಳವಿಸುವದೈ ಜೀವನ್ಮುಕುತಿ 3
ನಾರಾಯಣನೇ ಪರಮಗತಿಯು ಈ
ನರಜನ್ಮಕೆ ಬಂದಿರೆ ಲಾಭವಿದೇ
ಅರಿತು ಇದನು ತಾ ಸಾಧನೆ ಮಾಳ್ಪುದು
ಗುರುಶಂಕರನಾ ಬೋಧಸಾರವಿದು 4