ಕರುಣಿಸೊ ಗುರು ತಾರಿಸೊ
ಶರಣರಕ್ಷಕ ನಮ್ಮ ಕರುಣಾಕರ ದೇವ ಧ್ರುವ
¨Àವಜನ್ಮದಲಿ ಬಂದು ಬಹುಬಳಲಿದೆ ನಾನು
ಅವಿದ್ಯದಾಟಕೆ ಐವರು ಕೂಡಿ ತಾ
ಜೀವನ ಮುಕ್ತಿಗಾಣಿಸಗೊಡದಿಹರು 1
ಮೂರೊಂದು ಮಂದಿಯು ಸೇರಗೊಡದೆ ಪಥ
ಆರುಮಂದಿಯ ಕೂಡಿ ಕಾಡುತಲಿ
ಆರು ಮತ್ತೆರಡುಮಂಡೆಯ ಕಾವಲಿಗೆ ನಾನು
ಆರೆನಯ್ಯ ಶ್ರೀಗುರುಶಿರೋಮಣಿಯೆ 2
ಹತ್ತು ಹೊಳಿಯು ಸುತ್ತ ಅಡ್ಡಗಟ್ಟಿಹುದು
ಪಥ ನಡಲೀಸದೆ
ಇಂತಿವ ತಾರಿಸಿ ಮೂಢsÀಮಹಿಪತಿಯ
ಸಂತತ ಸದ್ಗತಿಸುಖ ಈವುದೆನಗಿನ್ನು 3

ಶುದ್ಧ ಸನ್ಮಾರ್ಗ ಸರ್ವರಿಗಿದು ಒಂದೆ
ಬುದ್ಧಿವಂತರು ತಿಳಿದರು ಇದರಿಂದೆ 1
ಇದರಿಂದೇವೆಂಬುದು ನಿರ್ವಾಣ
ಒದರುತಲಿಹುದು ವೇದಪುರಾಣ 2
ಪುರಾಣ ಪುಣ್ಯದ ಹಾದಿಯು ನಿಜ
ಸುರಮುನಿಗಳಿಗಿದು ಹೊಳೆವದು ಸಹಜ 3
ಸಹಜಾನಂದದ ಸುಖಸಾಗರ
ಬಾಹ್ಯಾಂತ್ರ ಸದೋತಿತ ಸಹಕಾರ 4
ಸಹಕಾರವು ಚಿನ್ಮಯ ಚಿದ್ರೂಪ
ಸೋಹ್ಯದೋರುವ ಶ್ರೀ ಗುರುಸ್ವರೂಪ 5
ಸ್ವರೂಪವೆ ಸದ್ಗೈಸುವ ಹಾದಿ
ಪರಮ ವೈಷ್ಣವರ ಮೂಲಾಗ್ರದ ಆದಿ 6
ಅಧಿವೆಂಬುದು ನಿಜನಿರ್ಧಾರ
ಸಾಧಿಸುದವರಿಗೆ ಸಾಕ್ಷಾತಾರ 7
ಸಾಕ್ಷಾತ್ಕಾರವೆ ಮೋಕ್ಷದಮನೆಯು
ಅಕ್ಷಯ ಪದ ಅದ್ವೈತದ ಖಣಿಯ 8
ಅದ್ವೈತವೆ ಆಧ್ಮಾತ್ಮ ಸುವಿದ್ಯ
ಸಿದ್ದಸಾಧಕರಿಗೆ ಆಗುವ ಸಾಧ್ಯ 9
ಸಾಧ್ಯವೆಂಬುದು ನಿಜಸಿದ್ಧಾಂತ
ಭೇದಿಸಿದವರಿಗೆ ಇದು ಸನ್ಮತ 10
ಸನ್ಮತವೆ ಮತ ಸರ್ವರಿಗೆಲ್ಲ
ಉನ್ಮನಲೀಹ ಮಹಾಯೋಗಿಯು ಬಲ್ಲ 11
ಬಲ್ಲೆವೆಂಬುದು ಬಲು ಅಗಾಧ
ಸೊಲ್ಲಿಗೆ ಸಿಲುಕದು ಗುರುನಿಜಭೋದ 12
ಬೋಧವೆ ಸದ್ಗುರುವಿನ ದಯಕರುಣ
ಸದ್ಗತಿಸುಖ ಸಾಧನದ ಸ್ಫುರಣ 13
ಸ್ಫುರಣವೆ ಬ್ರಹ್ಮಾನಂದದ ಹರುಷ
ತರಣೋಪಾಯದ ಮಹಾ ಉಪದೇಶ 14
ಉಪದೇಶವೆ ನಿಜ ಉಪನಿಷದ್ವಾಕ್ಯ
ಒಪ್ಪಿಡುವದು ಭೂಸ್ವರ್ಗತ್ರೈಲೋಕ್ಯ 15
ತ್ರೈಲೋಕ್ಯಕೆ ಇದು ನಿಜನಿಧಾನ
ಭಯವಿಲ್ಲದ ಮಹಾಸುಖಸಾಧನ 16
ಸಾಧನದಿಂದ ಸದ್ಗತಿ ಸಂಪೂರ್ಣ
ಸಾಧು ಸಜ್ಜನರಿಗೆ ಸಕಲಾಭರಣ 17
ಸಕಲಾಭರಣ ಸದ್ಗುರು ನಿಜ ಅಭಯವು
ಶುಕಾದಿ ಮುನಿಗು ಕೂಡಿದ ಪ್ರಭೆಯು 18
ಪ್ರಭೆಗಾಣಲು ತೋರದು ನೆಲೆನಿಭವು
ನಿಭವೆ ಮಹಾಮಂಗಳಕರ ಶುಭವು 19
ಶುಭದೋರುದು ಸದ್ಗುರು ಕೃಪೆಯಿಂದ
ಭ್ರಮೆಹಾರಿತು ಮಾಯೆ ಇದರಿಂದ 20
ಇದರಿಂದೆ ಇದರಿಟ್ಟಿತು ಪುಣ್ಯ
ಒದಗಿ ಕೈಗೂಡಿತು ಬಂತು ತಾರ್ಕಣ್ಯ 21
ತಾರ್ಕಣ್ಯವು ಬಂತೆನ್ನೊಳು ಪೂರ್ಣ
ಸರ್ಕನೆ ದೊರೆಯಿತು ಸದ್ಗುರುಖೂನ 22
ಖೂನವೆ ಎನ್ನೊಳಗಾಯಿತು ಧ್ಯಾನ
ಘನಸುಖದೋರುವ ಅನುಸಂಧಾನ 23
ಅನುಕೂಲಾದ ನಮ್ಮಯ್ಯ ಪ್ರಸಿದ್ಧ 24
ಪ್ರಸಿದ್ಧವೆ ಪ್ರತ್ಯಕ್ಷ ಪ್ರಮಾಣ
ಭಾಸುತಿಹುದು ಶ್ರೀಗುರು ಶ್ರೀಚರಣ 25
ಶ್ರೀಚರಣಕೆ ಎರಗಿಹ ಮಹಿಪತಿಯು
ಸೂಚನೆ ಮಾತ್ರ ಕೊಂಡಾಡಿದ ಸ್ತುತಿಯು 26

ಶ್ರೀ ಗುರು ಆತ್ಮರಾಮ ಸುರಮುನಿ ಸೇವಿತನಾಮ
ಸಜ್ಜನ ಹೃದಯ ವಿಶ್ರಾಮ ಶ್ರೀಹರಿ ಸರ್ವೋತ್ತಮ 1
ದೀನೋದ್ದಾರಣ ರಾಮ ಅನಾಥ ಬಂಧು ನಿಸ್ಸೀಮ
ಅನಂತ ಗುಣಮಹಿಮ ಶ್ರೀನಾಥ ಕಲ್ಪದ್ರುಮ 2
ಗುರುವರ ಪರಂಧಾಮ ಪತಿತಪಾವನ ನಾಮ
ಮಹಿಪತಿ ತಾರಕರಾಮ ಸದ್ಗತಿಸುಖ ವಿಶ್ರಾಮ 3

ಶ್ರೀಗುರುವೆ ಶ್ರೀದೇವದತ್ತ ಸದ್ಗುರವೆ ಶ್ರೀದೇವದತ್ತ
ಮಗ್ದುರುವೆ ಶ್ರೀದೇವದತ್ತ ಸದ್ಗತಿಸುಖ ಶ್ರೀದೇವದತ್ತ
ಅನಾಥಬಂದು ದೇವದತ್ತ ದೀನಬಂಧು ದೇವದತ್ತ
ಮುನಿಜನಪಾಲಕ ದೇವದತ್ತ ಘನಮಹಿಮೆಯು ಶ್ರೀದೇವದತ್ತ
ಬಾಹ್ಯಾಂತ್ರವೆ ಶ್ರೀದೇವದತ್ತ ಇಹಪರವೆ ಶ್ರೀದೇವದತ್ತ
ಮಹಿಪತಿಗುರುವೆ ದೇವದತ್ತ ಸಾಕಾರವೆ ಶ್ರೀದೇವದತ್ತ 1