ಕಾಯ ಸತ್ಯ ಸತ್ಯ ಸರ್ವ ಜೀವರನಿಟ್ಟುಕೊಂಡು
ವಿಸ್ತಾರವಾದೊಂದಾಲದೆಲೆಯಲ್ಲಿ ಮಲಗಿದ್ದು ಅ.ಪ.
ಹರಿ ಹ್ಯಾಗೆ ನಿತ್ಯನೊ ಹಾಗೆ ಜೀವನು ನಿತ್ಯ
ಹರಿಯೆಂಬೋ ಧಣಿಗೆ ಈ ಜೀವನು ಭೃತ್ಯ
ಹರಿ ಜೀವರೊಳಗೆ ಹೀಗೆ ತಿಳಿದವನು
ಧರೆಯೊಳಗೆಂದೆಂದಿಗು ಕೃತಕೃತ್ಯನು 1
ಹರಿಯೆಂಬೊ ರಾಜಗೆ ಗುರುಮೂರುತಿ ಮಂತ್ರಿ
ಪರಿವಾರ ಇವರಯ್ಯ ಜೀವಂಗಳು
ಅರಿತು ಈ ವಿಧದಲ್ಲಿ ನಿರುತ ಪಾಡುವರಿಗೆ
ಪರಲೋಕದಲಿ ದಿವ್ಯಭೋಗಂಗಳು 2
ಭಿನ್ನ ಭಿನ್ನ ಜೀವ ಭಿನ್ನ ಭಿನ್ನ ಕರ್ಮ-
ವೆನ್ನುವುದೆ ಘನ್ನತತ್ವಂಗಳು
ಅನ್ಯಥಾನುಡಿಯಲ್ಲ ಇನ್ನು ಸಂಶಯವಿಲ್ಲ
ಎನ್ನೊಡೆಯ ಹಯವದನ ಬಲ್ಲ 3

ನಾಟಕವಿದು ಹಳೆ ನಾಟಕ
ನೋಟಕೆ ಇದು ಬಲು ನೂತನ ಪ
ನಾಟಕ ಮಂದಿರ ಜಗವೆಲ್ಲ ಕಂಡಿರ
ನೋಟವು ಯಾರದೊ ಆಟವು ಯಾರದೊ ಅ.ಪ
ಇರುಳೊಳು ರಾಜಾಧಿರಾಜನಿವ
ಹಗಲಲಿ ಭಿಕ್ಷಕೆ ಹಾಜರಿವ
ಮುಗಿವುದು ಎನ್ನಯ ಪಾತ್ರವೆನ್ನುವುದೆ
ಹಗಲಿನತನಕವು ಕಾಣನಿವ 1
ಯುದ್ಧವು ದಿನವೊ ಈ ನಾಟಕದಿ
ಗೆದ್ದವರೊಬ್ಬರ ತೋರಿಸಿ
ಯುದ್ಧದಗೋಚಿಗೆ ಹೋಗದೆ ಶಾಂತಿಯೊ
ಳಿದ್ದ ಜನರೆ ಗೆದ್ದವರಿಲ್ಲಿ 2
ಕಲಿಪುರುಷನ ದೊಡ್ಡ ಸಭೆಯಲ್ಲಿ
ಕುಳಿತು ಮಾತಾಡುವರಾರು ಜನ
ಕಳುಹಿಸಲೊಬ್ಬನು ಇಳೆಯೊಳಗೊಬ್ಬರ
ಉಳಿಸದೆ ಗೆಲುವೆನು ನೋಡು ಪ್ರಭು 3
ಶೌರ್ಯ ಸಾಹಸ ಕಾಪಟ್ಯಗಳಾ
ಶ್ಚರ್ಯವು ಒಂದೊಂದು ದೃಶ್ಯದಲೂ
ಯಾರ್ಯರೆಂಬುದ ಕಾಣದೆ ವೇಷದ
ಮರ್ಯಾದೆಯು ವರ್ಣಿಪುದೆಂತು 4
ಕುಣಿವರು ಒಂದೆಡೆ ದಣಿವರು ಒಂದೆಡೆ
ಕೊನೆ ಮೊದಲಿಲ್ಲವೀ ನಾಟಕಕೆ
ಪ್ರಣಯಹನನ ದೃಶ್ಯಗಳನು ಒಂದೇ
ಕ್ಷಣದಲಿ ತೋರುವ ಅಸದೃಶ್ಯದ 5
ಹೊಸ ಹೊಸ ದೃಶ್ಯವು ಹೊಸ ಹೊಸ ಪಾತ್ರವು
ಪುಸಿಯಲ್ಲವು ಈ ನಾಟಕವು
ಶಶಿಕುಲದರಸ ಪ್ರಸನ್ನನಾಗಿ ತಾ
ಮುಸಿ ಮುಸಿ ನಗುತಲಿ ನೋಡುತಿಹ 6