ಎಷ್ಟು ಪೊಗಳಲಿ ನಾನು
ಎನ್ನೊಡೆಯ ನಿನ್ನ ವಿ-
ಶಿಷ್ಟ ಮಹಿಮೆಗಳನು
ಭಕ್ತರಿಗೆ ಬಂದಾ ಕಷ್ಟ ಕಳೆಯುವೆಯೋ ನೀನು
ಸುರಕಾಮಧೇನು
ವಿಷ್ಣುವೇ ಪರದೈವವೆಂದು
ದುಷ್ಟರಾಕ್ಷಸರನ್ನೆ ಕೊಂದು
ಸೃಷ್ಟಿಪಾಲಿಪ ಶ್ರೀ ರಮೇಶನೇ
ಇಷ್ಟ ಭಕುತರೊಳು ಶ್ರೇಷ್ಠನೆನಿಶಿದಿ ಪ
ತಾಯಿಯೂ ಬಂದು ಸೇವೆಗೆ ರಘುಪತಿ
ರಾಯನಲೆ ನಿಂದು ಬಯಸಲಿಲ್ಲಾ ಒಂದು
ಶ್ರೀಹರಿಗೆ ಬಂದು
ಕಾಯಬೇಕು ಸುಗ್ರೀವನೆನುತಲಿ
ತೋಯಜಾಕ್ಷಗೆ ಪೇಳಿ ವಾಲಿಯ ಉ-
ಪಾಯದಿಂದಲಿ ಕೊಲಿಸಿ ರವಿಜಗೆ ಸ-
ಹಾಯ ಮಾಡಿದಿ ವಾಯುತನಯನೆ 1
ಕಡಲ ಬೇಗನೆ ಹಾರೀ ಶ್ರೀರಾಮನ
ಮಡದಿಗುಂಗುರ ತೋರಿ ಅಲ್ಲಿದ್ದ ಅಸುರರ
ಜಡಿದೆ ಬಲು ಹೊಂತಕಾರಿ
ಮಾಡಿಯೊ ಸೂರಿ
ಒಡೆಯಗ್ವಾರ್ತೆಯ ಪೇಳಿ ಶೀಘ್ರದಿ
ನಡೆಸಿ ಸೈನ್ಯವ ದಶಮುಖನ ಶಿರ
ಹೊಡೆಸಿದಾಕ್ಷಣ ಲೋಕಮಾತೆಯ
ಒಡಗೂಡಿಸಿದೆಯೋ ಶ್ರೀರಾಮಚಂದ್ರಗೆ 2
ಮೂರು ರೂಪವ ತಾಳ್ದಿ ಮಹಯೋಗ್ಯ ಜನರಿಗೆ
ಸಾರ ತತ್ವವ ಪೇಳ್ದಿ
ಶರಣ್ಹೊಕ್ಕ ಜನರಪಾರ ದುಃಖವ ಶೀಳ್ದಿ
ಮೊರೆಯ ಕೇಳ್ದಿ
ಧೀರ ಕದರುಂಡಲಗಿ ಹನುಮಯ್ಯ
ಸೇರಿದೆನೊ ನಿನ್ನಂಘ್ರಿ ಕಮಲವ
ಗಾರು ಮಾಡದೆ ಸಲಹೊ
ಕರುಣವಾರಿಧಿ ನೀಯೆನ್ನನೀಗಲೆ 3

ಸಿರಿ ಚರಣದಲ-
ಪಾರ ಭಕುತಿಯನೀಯೋ ತವ ಸೇವಕನೆನಿಸಿ
ಕೀರುತಿಯನು ಪಡೆಯೋ ಭವಕ್ಲೇಶ ಕಳೆಯೊ ಪ
ಸೂರಿ ಸುಬ್ಬಣಾಚಾರ್ಯಕರಸ-
ರೋರು ಹಗಲಲಿ ಪೂಜೆಗೊಳುತಲಿ
ಚಾರುತರ ಶ್ರೀ ಜಯಮಂಗಳಿಯ
ತೀರದೊಳಿರುವ ವೀರ ಮಾರುತಿ ಅ.ಪ.
ಪ್ರತಿ ವರುಷ ಮಾಘಸಿತ | ನವಮಿ ದಿನದೊಳು ನೀ-
ನತಿವಿಭವದೊಳು ನಗುತ | ಭಕುತರಿಷ್ಟವ ಸಲಿಸೆ
ರಥದೊಳಗೆ ಕುಳ್ಳಿರುತ | ವಿಧ ವಿಧ ವಾದ್ಯಗಳ
ತತಿಯನಾಲೈಸುತ | ಅತಿ ಮೋದಬಡುತ
ಪರಿ ಸಂ-
ಸ್ತುತಿಸೆ ಹಿಗ್ಗುತಲವರ ಸ್ವಮನೋ-
ರಥಗಳ ನೀ ಸಲಿಸುವೆನೆನುತಲಿ
ಅತುಳ ವಿಕ್ರಮದಭಯ ಹಸ್ತದಿ
ಕೃತಿರಮಣ ಸಿರಿವರ ಹರಿಯನನು
ಮತವ ಪಡೆಯುತ ರಥವ ನಡೆಸಿ
ಚತುರ ದಿಕ್ಕಲಿ ಬಿಜಯ ಮಾಡುತ
ಸತತ ಹರುಷವಗರೆವ ದೇವ 1
ರಕ್ಕಸಕುಲ ತಮ ಭಾನು | ತಾಮಸರ ಧ್ಯಾನಕೆ
ಸಿಕ್ಕುವನಲ್ಲ ನೀನು | ಸುಜನರ ಹೃದಯದೊಳು
ಅರ್ಕನೊಲು ಪೊಳೆವನು | ಹರಿಸಿರಿಗಾಳುಳಿದು
ಬಕ್ಕ ದಿವಿಜರಿಗಿನ್ನು | ಗುರುಬಲ್ಲೆ ನಾನು
ಚಿಕ್ಕ ರೂಪವಗೊಂಡು ಲಂಕೆಯ
ಪೊಕ್ಕು ರಾಮನ ಸತಿಯ ಕಂಡು
ತುಕ್ಕಿ ವನವನು ಸೂರೆ ಮಾಡಿ
ಉಕ್ಕಿನ ಧ್ವಜಸ್ತಂಭದಿಂದ
ಸೊಕ್ಕಿ ಬಂದ ದನುಜವ್ರಾತವ
ಕುಕ್ಕಿ ಕೆಡಹಿ ಪುರವನುರಹಿ
ಅಕ್ಕರದ ಮಣಿಸಹಿತ ಬಂದು
ಪಕ್ಕಿದೇರನಿಗೆರಗಿ ನಿಂದೆ 2
ತುತಿಸ ಬಲ್ಲೆನೆ ನಾನು | ನಿನ್ನಯ ಸುಗುಣಗಳ
ತತಿಗಳೆಲ್ಲವನು | ತ್ರಿಪುರ ಸುಂದರಿ ಪಾ-
ರ್ವತಿ ಪತಿಯ ಪಡೆದವನು | ರಂಗೇಶವಿಠಲಗೆ
ಅತಿಪ್ರೀತಿಸುತ ನೀನು | ನಿಷ್ಕಾಮಯುತನು
ಪತಿತರನುದ್ಧರಿಸಲು ನೀ ಸಿರಿ
ಪತಿಯ ಮತದೊಳು ಹನುಮ ಭೀಮ
ಯತಿಯ ರೂಪವ ತಾಳಿ ಹರುಷದಿ
ಕ್ಷಿತಿಯ ಭಾರವ ಹರಸಿ ಸಲಹಿದೆ
ಅತುಳ ಮಹಿಮ ನಿನ್ನಪರಿಮಿತ ಶ
ಕುತಿಗೆ ನಮೊ ನಮೊ ವಾಯುತನಯನೆ
ಸತತ ಮುದದೊಳು ನಿನ್ನ ಸ್ಮರಿಸುವ
ಮತಿಯ ಪಾಲಿಸು ಪತಿತ ಪಾವನ 3