ಭಜಿಸಿರೋ ಭಜಿಸಿರೋ ಅಜನ ಪೆತ್ತವನಾ
ಭುಜಗಶಯನ ಮದಗಜವ ಪೊರೆದನಾ ಪ
ಭಜಕರ ಕೂಗಿಗೆ ನಿಜವ ತೋರುವನಾ
ಸುಜನೋದ್ಧಾರನ ವಿಜಯ ರಾಘವನಾ ಅ.ಪ
ರಾಗವಿದೂರನ ರಾಗೋಲ್ಲಾಸನ
ರಾಗಕೆ ಒಲಿವನಾ ರಾಗವನುಣಿಪನ
ರಾಗದಿ ಮುರಳಿಯ ಊದಿ ರಾಜಿಸುವನ
ರಾಗದಿ ನಮಗನುರಾಗವನೀವನ1
ಶರಣರ ದುರಿತವ ಪರಿಹರಿಸುವನ
ಧರಣಿಯನೀರಡಿ ಅಳೆದವನ
ಕರುತುರುಗಳ ಕನಿಕರದಿಂಕಾಯ್ದನ
ವರದಾಯಕ ಮಾಂಗಿರಿ ರಂಗಯ್ಯನ2

ಸ್ತುತಿಸಿ ಪ್ರಾರ್ಥಿಪೆ ನಿನ್ನನು ಸರಸ್ವತಿ
ಸ್ತುತಿಸಿ ನಮಿಪೆ ನಿನ್ನನು ಪ.
ಸ್ತುತಿಸಿ ನಮಿಸಿ ನಿನ್ನ ಜತನ ಮಾಡುತ್ತ ವದನದಿ
ಸ್ತುತಿಸುವ ಭಾಗವತರನು ತೋರಮ್ಮಾ ಅ.ಪ.
ಅಕ್ಷರಕ್ಷರ ರೂಪದಿ ಶ್ರೀಹರಿಯಾ
ಅಕ್ಷಯ ನಾಮವನು ಸ್ತುತಿಯ ಮಾಳ್ಪ
ಸುಕ್ಷೇಮ ಪಡೆದಿಹ ಮಾತೆ ಸರಸ್ವತಿ ಪ್ರತಿ
ಅಕ್ಷರವನು ಅರಿವಾ ಭಾಗ್ಯವ ತೋರೆ 1
ರಾಗರಾಗದಿ ಭಜಿಪೆ ಶ್ರೀ ಹರಿಯಾ ಅನು
ರಾಗಕೆ ಪಾತ್ರಳಾಗಿ ವಲಿಸಿಹೆ
ಭಾಗವತಾಗ್ರಣಿ ಶ್ರೀಹರಿ ನಾಮವ
ಶೀಘ್ರದಿ ಸ್ತುತಿಸುವ ಭಾಗವತರ ತೋರೆಂದು 2
ಅಗಣಿತ ಮಹಿಮೆಯನೂ ಬಲ್ಲವಳು ನೀ
ಸುಗುಣಿ ಸರಸ್ವತಿಯೆ ಶ್ರೀ ಶ್ರೀನಿವಾಸನ
ಅಗಣಿತ ಗುಣಗಳ ಪೊಗಳುವ ಮತಿಯಿತ್ತು
ಅಘಹರ ಹರಿಭಕ್ತರಾ ಲಗುಬಗೆಯಲಿ ತೋರೆ 3