ಮಂಜುಳನಾದವು ರಂಜಿಸಿತು
ಕಂಜನಯನಕೃಷ್ಣ ಕೊಳಲನು ಊದಲು ಪ
ಅಂಜಲಿಯಲಿ ಪುಷ್ಪಹಾರವ ಪಿಡಿಯುತ
ಸಂಜೆಯ ತಿಂಗಳು ಬೆಳಗಿರಲು ಅ.ಪ
ಕೈಯಲಿ ವೀಣೆಯ ನುಡಿಪ ಕನ್ನೆಯರು
ಮೈಯಿನ ಗಂಧವ ಚೆಲ್ಲುತಲಿರಲು
ಸುಯ್ಯಿ ಸುಯ್ ಸುಯ್ ಎಂದು ಚಲಿಸಲು ಎಲರು
ಗೋಪಿ ವೃಂದವು ನಲಿಯಲು1
ಸರಿಗಮಪದನಿ ಸ್ವರಗಳ ರವದಲಿ
ಸರಸ ಸಾಹಿತ್ಯವು ಉರುಳುತಲಿರಲು
ಮುರಳಿಯ ಇಂಚರ ಸರಿಸಮ ತೂಗಲು
ವರದ ಮಾಂಗಿರಿರಂಗ ನಸುನಗೆ ಬೀರಲು 2

ಮುರಳೀ ಲೋಲನ ಪ್ರೇರಿಸುವಳು ರಾಧೆ ಪ
ಒಲಿವಲಿ ನಲಿವಲಿ ಉಲಿವಲಿ ನಿಲುವಲಿ
ಮಲಿನವ ಕಳೆವಲಿ ಲೀಲೆಗಳಲಿ ರಾಧೆ ಅ.ಪ
ಕಂಗಳ ನೋಟದಿ ಸಂಗರದಾಟದಿ
ಅಂಗ ಸೌಂದರ್ಯದಿ ಮಂಗಳ ವೇಷದಿ 1
ಮುರಳಿಯ ರವದಲಿ | ಕೊರಳಿನ ಸರದಲಿ
ಕರುಣೆಯ ಮನದಲಿ | ಪರಿಮಳ ಭರದಲಿ2
ಮಾಂಗಿರಿ ಶೃಂಗದಿ | ರಂಗನ ವೇಷದಿ
ಮಂಗಳನಾದದಿ | ಹೊಂಗೊಳಲೂದಿ 3