ಪಾರ ಶಂಭೋ ಪಾಲಿಸಭವ
ಧೀರ ಶ್ರೀಹರಿಸಖನೆ ಪರಶಿವ ಪ
ಮೂರು ಪುರವ ಗೆಲಿದ ಮಹಿಮ
ಮೂರು ಕರಣ ಶುದ್ಧನೆನಿಸಿ
ಮೂರು ಗುಣಗಳ ಹಾರೈಸೆನಗೆ
ಪಾದ ಭಕ್ತಿ 1
ಪಂಚಮುಖನೆ ಪದಕೆ ನಮಿಪೆ
ಪಂಚಕ್ಲೇಶಗಳಳಿದು ಎನ್ನ
ಪಂಚಕತ್ವ ನೀಗಿಸಿ ವಿ
ರಂಚಿಪಿತನ ದಿವ್ಯಧ್ಯಾನ 2
ಕಾಮದಹನ ನೀಲಕಂಠ
ಸ್ವಾಮಿ ನಿಮ್ಮನು ನಂಬಿ ಬೇಡ್ವೆ
ಕ್ಷೇಮವಿತ್ತು ಪ್ರೇಮದೆನಗೆ
ಭೂಮಿಪತಿ ಶ್ರೀರಾಮನೊಲುಮೆ 3

ಬಂತವ್ವಾ ತಂಗಿ ಬಂತವ್ವಾ ಈ
ಗೊಂದು ಮಾತು ನೆನಪು ಬಂತವ್ವಾ ಪ
ಅಂತರಂಗದೊಳು ಕಂತುಜನಕ ತನ್ನ
ಚಿಂತಿಪರ್ಹಂತೆಲಿ ನಿಂತಿಹ್ಯನಂತೆ ಅ.ಪ
ಮರುಳು ಬುದ್ಧಿಯನು ನೀಗವ್ವ
ಬರೆ ತಿರುತಿರುಗಿ ಮರುಗಬೇಡವ್ವ
ಕರಿರಾಜ ದ್ವರದನು ತರುಣಿಯ ಪೊರೆದನು
ಸರಸದಿ ಪಾಂಡವರ ನೆರಳಾಗಿ ನಿಂತನು 1
ಹಂಚಿಕೆ ಪೇಳುವೆ ನಿನಗವ್ವ ನಿನ್ನ
ವಾಂಛಲ್ಯ ಗುಣವೊಂದು ಕಳೆಯವ್ವ
ಕಿಂಚಿತ್ತು ಮನದೊಳು ವಂಚನಿಲ್ಲದೆ ವಿ
ರಂಚಿಪಿತನ ನಂಬಿ ಭಜಿಸವ್ವ 2
ಸುಳ್ಳೆ ಕಳವಳಿಸುವುದ್ಯಾಕವ್ವ ತಿಳಿ
ನಳಿನಾಕ್ಷನ ಘನ ಮಹಿಮ್ಯವ್ವ
ಹೊಲಸು ದೇಹದಾಸೆ ನೀಗಿದ ಭಕ್ತಗೆ
ಸುಲಭನು ಶ್ರೀರಾಮ ಕೇಳವ್ವ 3