ಕೊಟ್ಟಿಗೋತ್ಸವ ಗೀತೆ
ಕೊಟ್ಟೊಗೋತ್ಸವ ನೋಡಿ ಸೃಷ್ಟಿಗೀಶ್ವರನ ಪ.
ವಾಸುದೇವನ ಸಹಸ್ರಸ್ತಂಭಮಂಟಪವ
ದಾಸರು ಬಂದು ಶೃಂಗಾರವ ಮಾಡಿ
ದೇಶದ ಮೇಲುಳ್ಳ ಬೊಂಬೆಗಳನು ರಚಿಸಿ
ಲೇಸಾದ ಮೇಲುಕಟ್ಟುಗಳ ಕಟ್ಟಿದರು 1
ಸೃಷ್ಟಿಗೀಶ್ವರನಾದ ರಂಗನಾಥನಿಗೆ
ಕೊಟ್ಟಿಗೋತ್ಸವವನ್ನು ನಡೆಸಬೇಕೆನುತ
ಕಟ್ಟಿ ಕಂಕಣವನ್ನು ನಾಲ್ಕುವೇದಗಳಿಂದ
ಭಟ್ಟರು ಓದಿ ಪೇಳಿದರು ಸಂಭ್ರಮದಿ 2
ವಜ್ರದ ಕಿರೀಟವಿಟ್ಟು ರತ್ನದಂಗಿಯ ತೊಟ್ಟು
ಅರ್ಜುನಸಖ ಸಂಭ್ರಮದಲಿ ಪೊರಟು
ಸ್ವರ್ಗದ ಬಾಗಿಲೊಳಗೆ ತಾ ನಿಂದು
ಮೂರ್ಜಗವೆಲ್ಲ ಮೋಹಿಸುತಲೆ ಬಂದು 3
ಮಂದಹಾಸದಲಿ ನಿಂದು ಮಂಟಪದಲಿ
ಬಂದ ಆಳ್ವಾರರಿಗಾಸ್ಥಾನವಿತ್ತು
ಚಂದದಿಂದ ದಿವ್ಯ ಪ್ರಬಂಧವ ಕೇಳಿ
ಒಂದುಅಂಕಣ ಬಿಡದೆ ಬಂದ ಶ್ರೀರಂಗ 4
ಸಂಕ್ರಾಂತಿಯಲಿ ಶಂಕರನ ಪ್ರಿಯನು
ಶಂಕೆ ಇಲ್ಲದೆ ಆಭರಣವನು ಧರಿಸಿ
ಪಂಕಜಮುಖಿಯರೊಡಗೊಂಡು ಹರುಷದ
ಲಂಕಾರವಾಗಿ ಬಂದನು ಮಂಟಪಕೆ 5
ಮತ್ತೆ ಮರುದಿನದಲ್ಲಿ ಭಕ್ತವತ್ಸಲನು
ಮುತ್ತಿನಅಂಗಿ ಮುಂಡಾಸನಳವಡಿಸಿ
ಮುತ್ತಿನಛತ್ರಿ ಚಾಮರ ಸೂರೆಪಾನದಿ
ಮುತ್ತರಸಿಯ ಮಂಟಪಕೆ ನಡೆತಂದ 6
ಅರ್ಥಿಯಿಂಬಂದು ತಾ ಅಶ್ವವನೇರಿ
ಮತ್ತೆ ಬೇಟೆಯಮೃಗವನೆ ಕೊಂದು ಸಂ
ಕ್ರಾಂತಿಯ ಪಾರ್ವೇಟೆಯನಾಡಿ
ಸಂತೋಷದಿ ಬಂದ 7
ನಾರಿವೇಷವ ಆಳ್ವಾರರಿಗೆ ಧರಿಸಿ
ಪೇರಿಯ ತಾ ಬಿಟ್ಟು ತೇಜಿಯನೇರಿ
ಚೋರತನವ ಮಾಡಿದ ಭಕ್ತರಿಗೆ
ಮೂಲಮಂತ್ರವ ಪೇಳಿ ಮುಕ್ತಿಯನಿತ್ತ 8
ಮಿಂದು ಮಡಿಯನುಟ್ಟು ಅಂದು ರಾತ್ರಿಯಲಿ ಹ
ನ್ನೊಂದು ವಿಧ ಭಕ್ಷ್ಯಗಳನು ತಾ ಗ್ರಹಿಸಿ
ಬಂದ ಆಳ್ವಾರರಿಗೆ ಮುಕ್ತಿಯನಿತ್ತು
ಬಂದು ಆಸ್ಥಾನದಿ ನಿಂದ ಶ್ರೀರಂಗ 9
ಭಕ್ತರು ಮಾಡಿದ ಪ್ರಬಂಧವನೆಲ್ಲ
ಭಕ್ತಿಯಿಂದಲೆ ಪೇಳಿದ ಆಚಾರ್ಯರಿಗೆ
ಯುಕ್ತಿ ತೋರಿದ ಪರಾಶರವ್ಯಾಸರಿಗೆ ಬ್ರಹ್ಮ
ರಥವನಿತ್ತ ಬ್ರಹ್ಮಾಂಡರೂಪ 10
[ಶೌ]ರಿಯು ತಾನಿರಲು ಮೇಘಮಂಡಲದಂತೆ
ತೋರುವುದು ತಾರಕೆಯಂತೆ ಮೈಯುಡುಗೆ
ವಾರಿಜನಾಭನ ಮುತ್ತಿನಂಗಿಯ ನೋಡು
ವವರಿಗೆ ತಾ ಆನಂದವಾಗಿಹುದು 11
ಕ್ಷೀರಸಾಗರದಲ್ಲಿ ಪವಡಿಸಿಹ ಹರಿಗೆ
ಕ್ಷೀರಬಿಂದುಗಳು ಮೈಯೊಳಗೆ ಬಿದ್ದಂತೆ
ವಾರಿಜನೇತ್ರಗೆ ವಜ್ರದನಾಮವು
ಧರಿಸಿದರು ಹೇಮದ ಪಾದಹಸ್ತಗಳ 12
ಮುತ್ತಿನಂಗಿಸೇವೆ ನೋಡಬೇಕೆನುತ
ಹತ್ತುಸಾವಿರ ಪ್ರಜೆ ಬಂದು ನಿಂತಿರಲು
ಇತ್ತು ಕಾಣಿಕೆಯನು ನೋಡಿ ವೆಂಕಟರಂಗನ
ಮುಕ್ತರಾದೆವೆಂದು ಭಕ್ತರು ನುಡಿದರು 13

ಶ್ರೀ ಪಾದರಾಜರ ಶ್ರೀ ಪಾದಾರ್ಚನೆ ಮಾಳ್ಪ-
ರೀ ಪೃಥುವಿಯೊಳು ಧನ್ಯರು ಪ
ಗೋಪಿನಾಥ ಪದಾಬ್ಜ ಮಧುಪ ದ-
ಯಾ ಪಯೋನಿಧಿ ಸುಜನರಂತಃ-
ಸ್ತಾಪಹಾರಕ ಗೋಪ ಸಕಲ ಕ-
ಲಾಪವಿದ ತಾಪತ್ರಯಾಪಹ ಅ.ಪ.
ಊರೆಲ್ಲಿ ತೋರೆಷ್ಟು ದೂರದಲ್ಲಿಹುದೆಂದು
ಹೀರ ವರ್ಣರು ಬಂದು ಕೇಳಲು
ತೋರಿ ತುರುಗಳ ಗತಿಯ ಸೂರ್ಯನ
ತೋರಿ ತಮ್ಮಯ ಪೋರ ವಯಸನು
ಸೂರಿಗಳೇ ನೀವರಿಯರೆನ್ನುತ
ಚಾರು ಉತ್ತರವಿತ್ತ ಧೀರರ 1
ಭೂದೇವನನು ಕೊಂದು ಬಾಧೆಗಾರದೆ ನೃಪ
ತಾ ದೈನ್ಯದಲಿ ನಿಂದು ಬೇಡಲು
ಪಾದ ಪದ್ಮಾ-
ರಾಧನೆಯ ತೀರ್ಥವನು ಪ್ರೋಕ್ಷಿಸಿ
ಆದರದಲೀಕ್ಷಿಸುತ ಭೂಪನ
ಕಾದ ಕಾಂಚನದಂತೆ ಮಾಡಿದ 2
ಶಂಕಿಸಿ ದ್ವಿಜವೃಂದ ಆತಂಕಗೊಳ್ಳುತಲಿರೆ
ಮಂಕುಗಳಾ ಡೊಂಕು ತಿದ್ದಲು
ಬಿಂಕದಲಿ ತರಿಸಿ ಗೇರೆಣ್ಣೆ
ಪಂಕದೊಳಗದ್ದಿರುವ ವಸ್ತ್ರಕೆ
ಕಲುಷ ಹಾರಿಸಿ
ಕಿಂಕರ ಮನಶಂಕೆ ಬಿಡಿಸಿದ 3
ಹರಿಗರ್ಪಿಸಿದ ನಾನಾ ಪರಿಯ ಶಾಖವ ಭುಂಜಿಸೆ
ನರರು ತಾವರಿಯದೆ ಜರಿಯುತ್ತಿರೆ
ಹರುಷದಿಂದಲಿ ಹಸಿಯ ವಸ್ತುಗ-
ಳಿರವ ತೋರಿಸಿ ಮರುಳ ನೀಗಿಸಿ
ಶರಣು ಶರಣೆನಲವರ ಪಾಲಿಸಿ
ಮೆರೆದ ಬಹು ಗಂಭೀರ ಗುರುವರ 4
ಘೋರಾರಣ್ಯದಿ ದಿವ್ಯ ಕಾಸಾರ ನಿರ್ಮಿಸಿ
ನಾರಸಿಂಹನ ನೆಲಸಿ
ಊರು ಮಂದಿಯು ನೋಡುತಿರಲಾ-
ವಾರಿ ಮಧ್ಯದಿ ಬಂದ ಗಂಗೆಗೆ
ಸೀರೆ ಕುಪ್ಪಸ ಬಾಗಿನಂಗಳ
ಧಾರೆಯೆರೆದಪಾರ ಮಹಿಮರ 5
ಫಣಿ ಬಂಧ ನಿವಾರಿಸಿ
ಭಾಷಿಸಿ ಫಣಿಪನ್ನ ತೋಷಿಸಿ
ಕಾಶಿ ಗಯಾ ಶ್ರೀ ಮುಷ್ಣದ್ವಾರಕ
ಶೇಷಗಿರಿ ಮೊದಲಾದ ಪುಣ್ಯ ಪ್ರ-
ದೇಶಗಳ ಸಂಚರಿಸಿ ಭಕ್ತರ
ದೋಷರಾಶಿಯ ನಾಶಗೈಸಿದ 6
ಕಸ್ತೂರಿತಿಲಕ ಶ್ರೀಗಂಧ ಲೇಪನದಿಂದ
ನಿತ್ಯ ಮಹೋತ್ಸವಗೊಳುತ
ಮುತ್ತಿನಂಗಿಯ ಮೇಲ್ಕುಲಾವಿಯು
ರತ್ನ ಕೆತ್ತಿದ ಕರ್ಣಕುಂಡಲ
ಬಿತ್ತರದಿ ಧರಿಸುತ್ತ ರಥವನು
ಹತ್ತಿ ಬರುತಿಹ ಸ್ತುತ್ಯ ಬಿರುದಿನ 7
ಆರ ಬೃಂದಾವನ ಸೇವೆಯ ಮಾಡಲು
ಕ್ರೂರ ಭೂತಗಳೆಲ್ಲ ದೂರವು
ಆರ ಬೃಂದಾವನದ ಮೃತ್ತಿಕೆ
ನೀರು ಕುಡಿಯಲು ಘೋರಕ್ಷಯ ಅಪ-
ಸ್ಮಾರ ಗುಲ್ಮಾದಿಗಳ ಉಪಟಳ
ಹಾರಿ ಪೋಪುದು ಆ ಮುನೀಶ್ವರ 8
ಪರವಾದಿಗಳ ಬೆನ್ನುಮುರಿವ ವಜ್ರದ ಡಾಣೆ
ಶರಣ ರಕ್ಷಾ ಮಣಿಯೆ
ದುರಿತ ತಿಮಿರಕೆ ಮೆರೆವ ದಿನಮಣಿ
ಎನಿಸಿ ಪೂರ್ವ ಕವಾಟ ನಾಮಕ
ಪುರದ ನರಕೇಸರಿ ಕ್ಷೇತ್ರದಿ
ಸ್ಥಿರದಿ ಶ್ರೀ ಕಾಂತನನು ಭಜಿಸುವ 9