ಕೇಳಬಾರದೋ ಕರ್ಣದಿಂ ಕೇಳಬಾರದೋ ಪ
ಕೇಳಬಾರದು ಕೀಳರಾಡುವ
ಕೀಳುವಚನ ಕಾಲತ್ರಯದಿಅ.ಪ
ಪರರ ಗುಣವ ಜರೆದು ತಮ್ಮ
ಮರುಳಗುಣವ ಪಿರಿದೆನಿಪ
ದುರುಳರೊಚನ ಕೇಳುತ್ತೊಡನೆ
ಹರಿದು ಪೋಗ್ವುದು ಪೂರ್ವಪುಣ್ಯ 1
ಮರವೆ ಮಾಯ ದುರ್ವರ್ತನ ಸತತ
ದುರಾಚಾರದಿ ಹೊರಳುವಂಥ
ಪರಮನೀಚರ ಮಾತಿಗ್ಹೋಗಲು
ನರಕ ತಪ್ಪದು ಕಡೆಯತನಕ 2
ಗುರುಹಿರಿಯರನು ನಿಂದಿಪ
ನರಕಿಗಳ ಆವಾಸದಿರಲು
ಶರಣರಸ ಕರುಣಾಭರಣ
ಸಿರಿಯರಾಮ ಮರೆಯಾಗ್ವ 3

ನೆನೆಯಲಳವಲ್ಲಗಣಿತ ಜನುಮ (ಪ)
ಕುಣಿಕೆಯೊಳಗೆ ಪೋಣಿಸಿ
ನೋಯಿಸುತ
ಕುಣಿಸಿ ಕೊಲ್ಲುದುಚಿತವೇ
ಪೊರೆಯೊ ಸತತದಲಿ 1
ಶ್ವಾನ ಸೂಕರ ಕ್ರಿಮಿಯ ಕೀಟಕ
ತೊಳಲಿ ಬಳಲುತ ನಾ
ಹಾನಿಬಟ್ಟೆನ್ನದೇನು ತಪ್ಪಿರೆ
ಜಾನಕೀಶನೆ ನೀನೆ ಕ್ಷಮೆಮಾಡಿ ಪೊರೆಯೊ ಸತತದಲಿ 2
ತುಂಬಿ ಮಾಯೆಯಿಂ ನಂದಿಪೋಗ್ವುದು
ನಿನ್ನ ಮಾಯಾಮಹಿಮೆದೆಲ್ಲವು ನಿನ್ನ ಹೊರತಿನ್ನನ್ಯವೊಂದಿಲ್ಲ
ಎನ್ನನ್ಯಾತಕೆ ಬನ್ನಬಡಿಸುವಿ ಭಿನ್ನವಿಲ್ಲದೆ ನಿನ್ನ ನಂಬಿದೆ
ರಕ್ಷಿಸು ಪಿಡಿದು ಸತತದಲಿ 3

ಮರುಳೆ ಸುಖ ನೀನೆನು ಪಡೆದಿ
ನರಜನುಮ ತಾಳಿ ಇಹ್ಯದಿ ಪ
ಪರಿಪರಿ ಜನುಮ ತಾಳಿ
ಪರಮ ಬಂಧದೊಳೊರಲ
ಉರುಳಿ ವರಮುಕ್ತಿ ದೊರೆವ ಕೀಲಿ
ಸ್ಮರಿಸಿ ಬಂದಿ ಹರಿಯ ಬಳಲಿ 1
ಅರಿಯದೆ ಮತ್ತು ಭವಮಾಲೆ
ಕೊರಳಿಗ್ಹಾಕಿಕೊಂಡಿ ದುರುಳ
ಮರೆಯಮೋಸ ಕಾಂಬೋದೆಲ್ಲ
ಹರಿದು ಪೋಗ್ವುದು ಸ್ಥಿರವಲ್ಲ 2
ಸಮಯ ಮಿಂಚಿಪೋದ ಬಳಿಕ
ಕ್ರಮದಿ ಮತ್ತೆ ಸಿಗುವುದೆ ಮೂರ್ಖ
ವಿಮಲ ಶ್ರೀರಾಮ ಪಾದಕಮಲ
ನಮಿಸಿ ಪಡಕೊ ಮುಕ್ತಿಮಾಲಾ 3

ಹರಿಯ ನೆನೆವಲ್ಲಿ ಮನವೆ ನೀ ಪ
ಅರಿವು ತಿಳಿವಲ್ಲಿ ಹರಿದುಹೋಗುವ
ದುರುಳ ಸಂಸಾರಕೆ ಮರುಳನಾಗಿ ನೀ
ನರಕಕ್ಹೋಗುವಿಯಲ್ಲೋ ಅ.ಪ
ಖೊಟ್ಟಿಗುಣಳಿವಲ್ಲಿ ಮನಸಿನ
ಭ್ರಷ್ಟತ್ವ ಕಳಿವಲ್ಲಿ
ಶಿಷ್ಟರಲ್ಲಿ ಮನವಿಟ್ಟು ಉಳಿಯದೆ ನೀ
ಕಷ್ಟದೊಳಗೆ ಬಿದ್ದು ಕೆಟ್ಟು ಹೋಗುವಿಯಲ್ಲೋ 1
ಮರವೆ ಮಾಯವನ್ನು ಮರುಳೆ ನೀ
ತರಿಯವಲ್ಲಿ ಇನ್ನು
ಪರಿ ವಿಚಾರಿಸದೆ
ದುರಿತದೊಳಗೆ ಬಿದ್ದು ಮರುಗುವಿಯಲ್ಲೋ 2
ಅಸೆ ನೀಗುವಲ್ಲಿ ಸಂಸಾರ
ದ್ವಾಸನೆ ಕಡಿವಲ್ಲಿ
ದಾಸರ ನಡೆನುಡಿ ಸೋಸಿಲಿಂ ತಿಳಿಯದೆ
ನಾಶನಾಗುವಿ ಯಮಪಾಶದೊಳಗೆ ಬಿದ್ದು 3
ಸತಿಸುತರ ಮಾಯಮೋಹದಿ
ಗತಿಸಿ ಪೋಗ್ವುದು ವಯ
ಕೃತ್ರಿಮನೆ ಅತಿ ಮಂದಮತಿಯೊಳು ಬಿದ್ದು ಘನ
ವ್ಯಥೆಯ ಬಡುವಿ ಮಹಗತಿಮೋಕ್ಷ ಪಡೆಯದೆ 4
ಮಂದಿ ಮಕ್ಕಳ್ಯಾರು ನಿನಗೀ
ಬಂಧು ಬಳಗ ಯಾರು
ಕುಂದುವ ಜಗಮಾಯದಂದ ತಿಳಿದು ಮಮ
ತಂದೆ ಶ್ರೀರಾಮನ ಹೊಂದಿಕೊಳ್ಳವಲ್ಲಿ 5