ಪಾದ ಬಿಡಲಾರೆ ಎನ್ನೊಡೆಯ ರಂಗ
ಭಾರ ನಿನ್ನಗೆ ಕೂಡಿತು ಪ
ನೀನೆ ಚಿಂತಾಮಣಿ ನೀನೆ ಪರುಷದ ಖಣಿ
ನೀನೆ ಎನ್ನಗೆ ಧಣಿ ವೇಣುಗೋಪಾಲ 1
ಪಕ್ಷಿವಾಹನ ಲೋಕರಕ್ಷಿಪನು ನೀನೆಲೊ
ಅಕ್ಷಯದಿ ದ್ರೌಪದಿಯ ರಕ್ಷಿಸಿದವ ನೀನೆ 2
ಪಾರ ಮಹಿಮನೆ ಸರ್ವಭಾರ ನಿನ್ನದಯ್ಯ
ಸೇರಿದೆನು ನಿಮ್ಮ ಪದಕೆ ಮಾರಪಿತ ಶ್ರೀರಾಮ 3

ಸಾಕು ಸಾಕು ಸವಿದಟ್ಟಿತು ನನಗೀಗ
ಸಾಕಾಯ್ತೀ ಸಂಸಾರದ ಸುಖವು ಪ
ಸಂಜೀವನದ ಅಮೃತವ ನಾಕಂಡಮೇಲೆ
ಗಂಜಿಗಾಸೆ ಮಾಡುವೆನೆ
ರಂಜಿತ ಚಿದಾನಂದವನು ಕಂಡಮೇಲೆ
ಗುಂಜಿನ ಮೈಸುಖವೆ ಪೇಳೋ 1
ಹಾಲ ಸಮುದ್ರವ ಕಂಡಮೇಲೆ ಪಶು
ಜಾಲವ ಬಯಸುವೆನೆ ಪೇಳೋ
ಲಾಲಿಸಿ ಚಿದಾನಂದವ ಕಂಡಮೇಲೆ
ಜಾಳು ವಿಷಯದ ಚಿಂತೆಯೇ ಪೇಳೋ 2
ಪರುಷದ ಪರ್ವತವ ನಾಕಂಡಮೇಲೆ
ಸಿರಿ ಬೇಕೆಂಬಂಧ ಚಿಂತೆಯೇ ಪೇಳೋ
ಪರಮಾತ್ಮ ಸಿದ್ಧಸಿದ್ಧವ ಕಂಡೆ
ಗುರು ಚಿದಂಬರನ ನಿನ್ನೇತರ ಚಿಂತೆ ಪೇಳೋ 3

ಸ್ಮರಿಸುವ ದಾಸರ ಮೊರೆ ಕೇಳದಿರೆ ಹರಿ
ಕರುಣಾಳು ನೀನೆಂಬ ಭರವಸಿನ್ಹ್ಯಾಗೆ ಪ
ಕರಿಧ್ರುವ ಬಲಿ ಪಾಂಚಾಲಿಯ ಪೊರೆದಂತೆ
ಸ್ಮರಿಪರ ಬಿಟ್ಟರೆಘಳಿಗಿರಲಾರಂತೆ
ಅರಿತು ವಿಚಾರಿಸು ನೋಡಿದವರಿಗಿದು
ಸರಿಬರುವುದೆ ನರಹರಿಯೆ ನೀನರಿಯೆ 1
ಕರುಣಾಕರನು ನೀ ನಿಜವಾಗಿರ್ದರೆ
ತ್ವರಿತದಿ ಬಂದೆನ್ನ ಮೊರೆ ಪಾಲಿಸೆಲೊ
ದುರಿತಭಯನಿವಾರ ನೀನಾದರೆ
ದುರಿತರಾಶಿ ಗಡ ಪರಿಹರಿಸಭವ 2
ಧರೆವರ ಧರ್ಮಗರಣ್ಯದಿ ಮುಗಿದ
ಪರುಷದನ್ನವನಿತ್ತು ನೀ ರಕ್ಷಿಸಿದೆ
ವರ ಬಿರುದು ನಿನಗಿರಬೇಕಾದರೆ
ತ್ವರಿತದಿ ಸಲಹೊ ಶ್ರೀಗುರು ರಾಮ 3