ತಪಿಸಲಾರೆ ನಾನು ಪರಿಪರಿ ತಾಪದಲಿ
ಕೃಪೆಮಡಿ ಸಲಹಿರಿ ಶ್ರೀ ಗುರುಗಳೆ ಪ.
ಸುಪಥ ಕಾಣದೆ ನಿಮ್ಮ ಪಾದವನೆ ನಂಬಿದೆನು
ಗುಪಿತ ಮಹಿಮರೆ ಇನ್ನು ಭವಪಾಶ ಬಿಡಿಸುತ್ತ ಅ.ಪ.
ಬಂಧು ವರ್ಗಗಳನ್ನ ಬದುಕಿಸುವರು ಎಂದು
ಬಂಧನದೊಳು ಬಿದ್ದು ಬೆಂದು ನೊಂದೆ
ಮುಂದೆ ದಾರಿಯ ಕಾಣೆ ಮುಕ್ತಿ ಮಾರ್ಗವನರಿಯೆ
ಬಂಧು ಬಳಗಗಳೆಲ್ಲ ನೀವೆಂದು ನಂಬಿದೆ 1
ಅಶನವಸನಗಳಲ್ಲಿ ಆಸೆಯನು ತೊರೆಯದೆ
ವಸುಮತಿಯೊಳು ಜ್ಞಾನ ಹೀನವಾಗಿ
ಪಶುವಿನಂದದಿ ತಿರುಗಿ ಕಾಲವ್ಯರ್ಥ ಕಳೆದೆ
ಅಸಮ ಮಹಿಮರೆ ಇನ್ನು ಅಜ್ಞಾನ ಪರಿಹರಿಸಿ 2
ಮಮತೆಯನು ತೊರೆಯದೆ ಮಾಯ ಪಾಶಕೆ ಸಿಲುಕಿ
ಮಮಕಾರದಿಂದ ನಾ ಮೈಮರೆತೆನು
ನಮಿಸುವೆನು ದೈನ್ಯದಲಿ ನಾನೀಗ ನಿಮ್ಮ ಪದಕೆ
ರಮೆಯರಸನ ತೋರಿ ಎನ್ನ ಮನ ಮಧ್ಯದಿ 3
ಪಾವನರೂಪರೆ ಪಾಪರಾಹಿತ್ಯರೆ
ಪಾವಿನಶಯನಗೆ ಪರಮಪ್ರಿಯರೆ
ದೇವತೆಗಳೊಡೆಯರೆ ದೇವಾಂಶ ಸಂಭವರೆ
ಪಾವಮಾನಿಗೆ ಪ್ರಿಯರೆ ಪಾವನ್ನಗಾತ್ರರೆ 4
ಆಪತ್ತು ಕಳೆಯುವರೆ ಶ್ರೀಪತಿಯ ತೋರ್ವರೆ
ಕೋಪಿಸದೆ ಎನ್ನೊಳು ಕೃಪೆಗೈಯ್ಯರಿ
ಗೋಪಾಲಕೃಷ್ಣವಿಠ್ಠಲ ತಾನು ಹೃದಯದಲಿ
ತೋರ್ಪುತೆ ಕರುಣಿಸುತ ಈ ಪರಿಯಿಂ ಸಲಹಿರಿ5

ಮಂಗಳಂ ಶ್ರೀ ಗುರುವರ್ಯರಿಗೆ | ಮಂಗಳಾಂಗರಿಗೆ
ಮಂಗಳಂ ಶ್ರೀ ಗುರುವರ್ಯರಿಗೆ ಪ.
ರಂಗನಾಥನ ಪದ ಸರೋಜಕೆ
ಭೃಂಗರೆನಿಸಿ ಮೆರೆಯುವರಿಗೆ ಅ.ಪ.
ತಂದೆ ಮುದ್ದುಮೋಹನರೆಂ
ತೆಂದು ಮೆರೆಯುತ
ಮಂದಮತಿಯ ಬಿಡಿಸಿ ಎನ್ನ
ತಂದೆಯಂತೆ ಪೊರೆಯುವರಿಗೆ 1
ನಾಗಶಯನ ಹರಿಯ ಭಜಿಪ
ಭೋಗಿವರರಿಗೆ
ಭಾಗವತರ ಸಂಘದೊಳಗೆ
ಯೋಗಿಯಾಗಿ ಚರಿಸುವರಿಗೆ 2
ಪರಮಪ್ರಿಯರಾಗಿ ಹರಿಗೆ
ಪರಮಪ್ರಿಯರೆಂದು
ಕರೆಸಿಕೊಳುತ ನರಹರಿಯ
ಚರಣ ಮನದಿ ಸ್ಮರಿಸುವರಿಗೆ 3
ಕರ್ಮಗಳನೆ ಕಡಿದು ಜ್ಞಾನ
ಧರ್ಮಮಾರ್ಗದಿ
ಧರ್ಮತತ್ವ ಬೋಧಿಸಿ ಅ-
ಧರ್ಮಗಳನೆ ಬಿಡಿಸುವರಿಗೆ4
ಗೋಪಾಲಕೃಷ್ಣವಿಠ್ಠಲನ
ರೂಪ ತೋರುತ
ಪಾಪಗಳನೆ ತರಿದು ಭವ
ಕೂಪದಿಂದ ಪೊರೆಯುವರಿಗೆ 5

ವರ್ಣಿಸಲಳವೆ ಕರುಣಾಳು ಗುರುವರ ನಿಮ್ಮ
ವರ್ಣವರ್ಣದ ಚರಿತೆ ಗುಣಗಣಗಳ ಪ.
ವರ್ಣಪ್ರತಿಪಾದ್ಯ ದೇವತೆಗಳಿಗೆ ಅಳವಲ್ಲ
ಇನ್ನಿದನು ಪಾಮರರು ಅರಿಯುವರೆ ಜಗದಿ ಅ.ಪ.
ಪ್ರತಿಪ್ರತಿ ಕಲ್ಪದಲಿ ಅತಿಶಯದ ತಪಚರಿಸಿ
ಪತಿತಪಾವನ ಹರಿಯ ಮನ ಮೆಚ್ಚಿಸಿ
ಕ್ಷಿತಿಯೊಳಗೆ ಅವತರಿಸಿ ದೇವಾಂಶರೆಂದೆನಿಸಿ
ಪತಿತರನು ಪಾವನವಗೊಳಿಪ ಘನಮಹಿಮ 1
ಭಕ್ತರು ಕರೆದಲ್ಲಿ ಆಸಕ್ತಿಯಿಂ ಬಂದು
ಯುಕ್ತಯುಕ್ತಗಳಿಂದ ತತ್ವಗಳನರುಹಿ
ಮುಕ್ತಿಗೊಡೆಯನ ಮಾರ್ಗ ಮುಕ್ತಾರ್ಥ ಜನಕರುಹಿ
ಮುಕ್ತಿಪಥ ಸವಿತೋರ್ವ ಶಕ್ತಿ ಮಹಿಮೆಗಳ 2
ಪಾದ ಪದ್ಮಸುತ ತಂದೆ
ಮುದ್ದು ಮೋಹನದಾಸರಾಯರೆಂದೆನಿಸಿ
ಮಧ್ವಮತಸಾರಗಳ ಹೀರಿ ಮಕರಂದವನು
ಸಿದ್ಧಿಗೊಳಿಸಿ ಸುಜನಕೀವ ಶ್ರೀ ಗುರುವೆ3
ಕರಿಗಿರಿ ನರಹರಿಯ ಚರಣಕಮಲ ಧ್ಯಾನ
ಅರಘಳಿಗೆ ಬಿಡದೆ ಮನಮಂದಿರದಿ ಸ್ಮರಿಪ
ಕರುಣಜಲನಿಧಿಯೆ ನಿಮ್ಮ ಮೊರೆಹೊಕ್ಕವರ ಕಾಯ್ವ
ಪರಮಪ್ರಿಯರೆಂತೆಂಬ ಬಿರುದುಳ್ಳ ಗುರುವೇ 4
ಕಮಲಾಂತ ಪ್ರೀತ ಶ್ರೀ ಕಮಲನಾಭನ ಪಾದ
ಕಮಲ ಮನದಲಿ ಸ್ಮರಿಪ ಕಮನೀಯ ಗಾತ್ರ
ಕಮಲಾಕ್ಷ ಗೋಪಾಲಕೃಷ್ಣವಿಠ್ಠಲನ ಪದ
ಕಮಲ ಮನದಲಿ ತೋರಿ ಕೃಪೆಯಗೈಯ್ಯುವುದು 5