ಕಾಡದೆ ಬೇಡದೆ ಕಂಗೆಡದೆ ಕೋ ಮನವೆ ನಿಜ ಸುಭಿಕ್ಷ
ಗುರು ಸಂರಕ್ಷ ಧ್ರುವ
ಅಳುಕದೆ ಬಳುಕದೆ ತುಳುಕದೆ ನಿಂದು ತಿಳಕೊ ನಿಜಸುಭಿಕ್ಷೆ
ಕೊಳಕ ಹುಳಕ ಮೊಳಕನೆಂದು ಮಾಡದಿರುಪೇಕ್ಷ
ನಾಳೆ ನಾಡದಿಂದ್ಯಾಗೆಂದು ಕಲ್ಪಿಸಿಕೊಬ್ಯಾಡಪೇಕ್ಷ 1
ಲಜ್ಜೆ ಅಳಿದು ಗುರು ಶರಣವ ಹೊಕ್ಕು ಸರಕ್ಕನೆ ಕೋ ಸುಭಿಕ್ಷೆ
ಹೆಜ್ಜೆಜ್ಜಿಗೆ ಸುರಿಮಳೆಗರೆವುತಲದೆ ಗುರುಕರುಣದಕಟಾಕ್ಷ
ಫಜ್ಜಿಗೆ ಬಂದುವರಿತ ಮ್ಯಾಲೆ ಕಂಜನಾಭನೆ ಸುಪಕ್ಷ 2
ಬೇಡಿಸಿಕೊಳ್ಳದೆ ನೀಡುತಲಾನೆ ಭಾಸ್ಕರ ಗುರು ಸಮರ್ಥ
ನೀಡಿ ನಿಜನಿಧಾನವ ಕೊಟ್ಟು ಮಾಡುತಲಾನೆ ಹಿತಾರ್ಥ
ಬಡವರಾಧಾರೆನ್ನೊಡೆಯನೆ ಜಗತ್ರಯಕ್ಕೊಬ್ಬನೆ ಕರ್ತ
ಮೂಢ ಮಹಿಪತಿಗನುದಿನ ಬಿಡದೆ ನೀಡುತಾನೆ ಸಕಲಾರ್ಥ 3

ಬೆಳಗುವ ಬನ್ನಿ ಮಂಗಳಾರತಿಯ
ಹೊಳೆಯುವ ಶ್ರೀ ಗುರುಮೂರುತಿಯ ಧ್ರುವ
ಮಂಗಳಸ್ವರದಲಾರತಿ ಮಾಡುವ
ಕಂಗಳಲಿ ಕಂಡು ಸ್ವಾಮಿ ನಲಿದಾಡುವ
ಸಂಗಸುಖದ ಸವಿ ಸೂರ್ಯಾಡುವ
ಮಂಗಳೋಚ್ಚ್ರಾಯವ ಕೊಂಡಾಡುವ 1
ಪಾಡುವ ಬನ್ನಿ ನಾಮಗಾಯನ
ಬೇಡುವದಿದೇ ಸುಖಸಾಧನವ
ನೀಡುತಲಿಹ ನಿಜನಿಧಾನವ
ಪಡೆವದಿದೊಂದು ಮುಖ್ಯ ಕಾರಣ 2
ಬಿಡದೆ ಕೊಂಡಾಡುವ ಕೀರುತಿಯ
ಪೊಡವಿಯೊಳು ಪಾಂಡವ ಸಾರಥಿಯ
ಮಾಡುವ ಬನ್ನಿ ಸೇವೆ ಶ್ರೀಪತಿಯ
ಒಡಿಯನಹುದೆಂದು ನೀ ಮಹಿಪತಿಯ 3