ಜೋಕೆ ಮಾಡೆನ್ನ ನಮ್ಮಯ್ಯ ರಂಗ
ಜೋಕೆ ಮಾಡೆನ್ನ ಪ
ಲೋಕನಾಥನೆ ಜೋಕೆ ಮಾಡೆನ್ನ ಕಾಕುಬವಣೆಯ
ಸಾಕುಮಾಡಿ ಏಕಚಿತ್ತದಿ ನಿಮ್ಮ ಭಜನೆ
ಜೋಕಿನೊಳು ಇರಿಸು ದೇವ ಅ.ಪ
ನಿಗಮಗೋಚರನೆ ಜಗದಯ್ಯ ವಿಜಯ್ಯ
ಖಗಪತ್ವಾಹನನೆ ಅಗಧರನೆ ಈರೇಳು
ಜಗವ ರಕ್ಷಿಪನೆ ರಘುಕುಲಾರ್ಯನೆ
ಮಗನಬಗೆ ಕೇಳು ಕರುಣದಿಂದಲಿ
ನಿಗಮಾತೀತನೆ ಮುಗಿವೆ ಕರಮಂ
ಹಗಲು ಇರಲು ಸುಗುಣಿ ಸಂತರ
ಸಂಗಸುಖ ಎನಗಗಲಿಸದೆ ಹರಿ 1
ಮೆರೆವವೇದವ ವರಸ್ಮøತಿಶಾಸ್ತ್ರವ
ಕರುಣಿಸೈ ದೇವ ಪರಿಹರಿಸು ಎನ್ನ
ಮರವೆ ಮಾಯವ ವರಭಕ್ತ ಜೀವ
ಮರವೆ ಮಾಯದಿ
ಸಿರಿಯವರ ತವಪರಮ ಚರಿತವ
ಅರಿವು ನಿಲ್ಲಿಸಿ ಕರುಣದಿಂ ತವ
ಚರಣಕುರುಹನು ಕರುಣಿಸಭವ 2
ದೃಢದಿ ಬೇಡುವೆನು ತಡಿಯೆನೀಭವ
ಎಡರುತೊಡರನು ಗಡನೆ ಬಿಡಿಸೆನ್ನ
ಕಡೆಗೆ ಮಾಡೆನ್ನ ನಿಮ್ಮಡಿಗೆ ಬಾಗುವೆನು
ನುಡಿಸು ಎನ್ನ ಮೆಲ್ನುಡಿಯೊಳನುದಿನ
ಬಿಡದೆ ತವ ಕೊಡು ಗೂಢಮಂತ್ರವ
ಬಿಡದೆ ಕೊಡು ನಿನ್ನಡಿಯ ದಾಸರ
ಸಡಗರದ್ಯನ್ನೊಡೆಯ ಶ್ರೀರಾಮ 3