(ಅ)
ತಂದೆ ಮುದ್ದುಮೋಹನ ದಾಸರೆನಿಸಿದ
ತಂದೆ ಶ್ರೀ ಗುರುವರ್ಯರೆ ಪ.
ತಂದಿರಿ ಜ್ಞಾನಾಂಬುಧಿ ಮಧ್ಯದೊಳಗೀಗ
ತಂದಿಹ ಎನ್ನ ದುಷ್ಕರ್ಮವ ತರಿಯುತ ಅ.ಪ.
ಬಂದೆನು ಭವದೊಳು ನಿಂದೆನು ತಾಪದಿ
ಮಂದಮತಿಯಿಂದ ಜಗದೊಳಗೆ
ಕುಂದುಗಳೆಣಿಸದೆ ಬಂದು ದರ್ಶನವಿತ್ತು
ಕಂದನಂದದಿ ದಯದಿಂದ ಪಾಲಿಸಿದಿರಿ 1
ಯೋಗಿಗಳೆನಿಸಿದ ಭೋಗಿವರರೆ ಶಿರ
ಬಾಗಿ ನಮಿಸುವೆ ಈಗ ನಾನು
ನಾಗಶಯನನ ತೋರಿ ಬೇಗ ಪಾಲಿಸಿರಿ
ಪೋಗುತಿದೆ ದಿನ ಜಾಗು ಮಾಡದೆ ಮುನ್ನ 2
ನರಸಿಂಹನನು ಹೃತ್ಸರಸಿಜದಲಿ ಕಾಂಬ
ಗುರುವರ ನಿಮ್ಮಂಘ್ರಿಗೆರಗುವೆನು
ಪರಿಪರಿ ತಾಪವ ಹರಿಸಿ ಎನ್ನ ಮನ
ಹರಿಗುರು ಚರಣದೊಳಿರುವಂತೆ ಕೃಪೆಗೈದೆ 3
ಪರಮ ಗುರುಗಳಿಗೆ ಪ್ರಿಯರಾಗಿ ಇಳೆಯೊಳು
ಚರಿಸಿ ಸುಜನರ ಪಾವನಗೈದು
ಪರಮ ಗುಪ್ತದಿಂದ ಹರಿಯ ಧ್ಯಾನಿಸುತ್ತ
ಧರೆಯೊಳಗಿರುವ ಪಾಮರರ ಮೋಹಿಸುವಂಥ 4
ಕಷ್ಟವ ಬಿಡಿಸಿರಿ ತುಷ್ಟರಾಗಿ ನೀವೆ
ಇಷ್ಟು ಪರಿಯಿಂದ ಬೇಡಿಕೊಂಬೆ
ಇಷ್ಟದೈವರು ನೀವೆ ಶ್ರೇಷ್ಠ ಶ್ರೀ ಗೋಪಾಲ
ಕೃಷ್ಣವಿಠ್ಠಲನ ಉತ್ಕøಷ್ಟದಿ ತೋರಿರಿ5

ಶ್ರೀ ಗುರುವರ್ಯರಿಗೆ ಜಯಮಂಗಳ ನಿತ್ಯ
ಭೋಗಿಶಯನಪ್ರಿಯಗೆ ಶುಭಮಂಗಳ ಪ.
ಆನಂದರತ್ನರು ಜ್ಞಾನಪ್ರಕಾಶ ಎಂದು
ನಾನಾ ವಿಧದಿ ಬಿರುದು ಪೊತ್ತವಗೆ
ಶ್ರೀನಿವಾಸನನು ಧ್ಯಾನವ ಮಾಳ್ಪಂಥ
ಜ್ಞಾನಪೂರ್ಣರಾದ ಗುರುಗಳಿಗೆ 1
ಪರಮಪ್ರಿಯರು ಪರಿಮಳರೆಂದೆನಿಸುತ
ಪರಿ ನಾಮವ ಧರಿಸಿಹಗೆ
ನರಸಿಂಹನನು ಹೃತ್ಸರಸಿಜದಲಿ ಕಂಡು
ಹರುಷವ ಪಡುವಂಥ ಗುರುಗಳಿಗೆ 2
ತಂದೆ ಮುದ್ದುಮೋಹನವಿಠ್ಠಲನೆಂಬಂಕಿತ
ಚಂದದಿಂದ ಗುರುಗಳಿಂ ಪಡೆದವಗೆ
ಬಂದ ಭಕ್ತರಿಗೆಲ್ಲ ಅಂಕಿತಕೊಟ್ಟು ಭವ
ಬಂಧನವ ಬಿಡಿಸುವ ಗುರುಗಳಿಗೆ 3
ಚಂದ್ರನ ತೆರದಿ ಪರಮಾರ್ಥ
ಚಂದ್ರೋದಯವ ನಿರ್ಮಿಸುವರಿಗೆ
ಚಂದದಿಂದ ಪರತತ್ವ ಪೇಳುವ
ಸುಂದರ ಮೂರುತಿ ಗುರುಗಳಿಗೆ 4
ಅಪಾರ ಕರುಣಾಜಲಧಿ ಎಂದೆನಿಪರಿಗೆ
ಶ್ರೀಪತಿ ಪಾದವ ತೋರ್ವಂಗೆ
ಗೋಪಾಲಕೃಷ್ಣವಿಠ್ಠಲನ ಧ್ಯಾನವನಿತ್ತುಕಾಪಾಡುವಂಥ ಶ್ರೀ ಗುರುಗಳಿಗೆ 5