ಬಂದಿರುವೆನು ಭೂಜಾತೆ | ಶರ-
ದಿಂದುವದನೆ ವೋ ಸೀತೆ ಪ
ಕೂಗುವುದೇತಕೆ ನಿಮ್ಮಯ ಪೆಸರೇ
ನೀಗ ತಿಳಿಸಿರೈ ಸ್ವಾಮಿ | ನುಡಿ
ಭಾಗವತ ಜನಪ್ರೇಮಿ ಅ.ಪ
ಹೀನತಮವ ಮುರಿದಜಗೆ ಶೃತಿಗಳಿತ್ತ
ಮೀನಾವತಾರನೆ ನಾನು | ಬಾ
ಜಾನಕಿ ಬೇಗನೆ ನೀನು
ಮೀನಾದರೆ ನೀರೊಳಗಿರುವುದು ಸರಿ
ಮಾನಿನಿಯಲಿ ಕಾರ್ಯವೇನು | ನಡಿ
ದೀನ ಜನರ ಸುರಧೇನು 1
ಕಮಲನಯನೆ ನಾ ಪೂರ್ವದಿ | ಗಜ-
ಗಮನೆಯೆ ನೋಡನುರಾಗದಿ
ಭ್ರಮೆಯಾತಕೆ ಕೇಳ್ ಕಠಿಣಾಂಗಗೆ ನಾ
ಸಮಳೆ ನಿನಗೆ ನೀ ನೋಡು | ಸಂ
ಭ್ರಮವಿದ್ದಲಿ ನಲಿದಾಡು 2
ವರಹಾರೂಪನೆ ಕಾಮಿನಿ | ಓ
ತರುಣಿಯರೊಳಗೆ ಶಿರೋಮಣಿ
ವರಾಹನಾದರೆ ಅಡವಿಯ ತಿರುಗುತ-
ಲಿರದೇತಕೆ ಇಲ್ಲಿ ಬಂದೆ | ನಡಿ
ಪರಿಪರಿ ಮೃಗಗಳ ಹಿಂದೆ 3
ಕರುಳ ಬಗೆದ ನರಸಿಂಹ | ನಾನು
ಪರಮ ಪುರಷ ಪರಬ್ರಹ್ಮ
ನರಸಿಂಹನು ನೀನಾದರೆ ನಡಿನಡಿ
ಗಿರಿಗುಹೆಯೊಳಗಿರು ಹೋಗೈ | ಬಹು
ಪರಿನುಡಿಗಳು ನಿನಗೇಕೈ 4
ಭೂಮಿಯ ದಾನವ ಬೇಡಿ ಬಲಿಯ ಗೆದ್ದ
ವಾಮನ ನಾನೆಲೆ ನಾರಿ | ಸು
ತ್ರಾಮಾದ್ಯರಿಗುಪಕಾರಿ
ಬ್ರಾಹ್ಮಣನಾದರೆ ನಮಿಸುವೆ ಚರಣಕೆ
ಹೋಮಧ್ಯಾನ ಜಪಮಾಡೈ | ನಿ
ಷ್ಕಾಮ ಜನರ ಪಥನೋಡೈ 5
ದುರುಳನೃಪರ ಸಂಹರಿಸವನಿಯ ಭೂ
ಸುರರಿಗೆ ಕೊಟ್ಟೆನೆ ದಾನವು | ಕೇಳ್
ಪರಶುರಾಮಾಭಿದಾನವು
ವರಮಾತೆಯ ಶಿರವರಿದವ ನೀನಂತೆ
ಸರಸವೇತಕೆನ್ನಲ್ಲಿ | ಮನ
ಬರುವಲ್ಲಿಗೆ ತೆರಳಲ್ಲಿ 6
ತಾಯನುಡಿಗೆ ತಮ್ಮಗೆ ರಾಜ್ಯವ ಕೊಟ್ಟು
ಪ್ರಿಯದಿ ವನದೊಳಗಿದ್ದೆನೆ | ದೈ
ತ್ಯೇಯ ನಿಕರವನು ಗೆದ್ದೆನೆ
ಸ್ರೀಯರಲ್ಲಿ ಹಿತವೇನು | ಕಮ
ಲಾಯತಾಕ್ಷ ನಡಿ ನೀನು 7
ನಾರಿಯರನು ಕೂಡಿ ರಾಸ ಕ್ರೀಡೆಯೊಳ್
ತೋರಿದೆ ಪರಿಪರಿ ಚಿತ್ರವ | ವಿ-
ಜಾರ ಪುರಷನಿಗೆ ಹೋಲುವಳಲ್ಲವು
ಸಾರ ಪತಿವ್ರತೆ ನಾನು | ಇ-
ನ್ನ್ಯಾರು ತಿಳಿಸು ಮತ್ತೆ ನೀನು 8
ಪತಿವ್ರತೆಯರ ಸದ್‍ವ್ರತವ ಕೆಡಿಸಿದಾ
ಪ್ರತಿಮ ಬುದ್ಧನೆ ಲತಾಂಗಿ | ಓ
ಮತಿವಂತಳೆ ಮೋಹನಾಂಗಿ
ಕೃತಕವಾಡದಿರು ಒಲ್ಲೆ | ಕೇ
ಳತಿ ಮೋಹಕ ನೀ ಬಲ್ಲೆ 9
ಹಲವು ನುಡಿಗಳೇನು ಕಲಿಯುಗಾಂತದಲಿ
ಮಲೆತ ಮನುಜರನು ಕೊಲ್ವೆನೆ | ಓ
ಲಲನೆ ನೋಡು ಬಲು ಚೆಲ್ವನೇ
ಕಲಿತನವ ತೋರಿಸದಿರು ಈ ಪರಿ
ಹಲವು ವೇಷ ನಿನಗೇಕೆ | ಕೇ
ಳೆಲವೊ ಸ್ವಾಮಿ ನುಡಿ ಜೋಕೆ 10
ವೇಷವಲ್ಲ ಸರ್ವೇಶ ನಾನು ಪರಿ-
ಪೋಷಿಸುವೆನು ನಿಜಭಕ್ತರ | ಸಂ-
ತೋಷಿಸುವೆನು ಧರ್ಮಯುಕ್ತರ
ಪೋಷಿಸುವನು ನೀನಾದರೆಲ್ಲಿ ನಿನ್ನ
ವಾಸಪೇಳು ನಿಜವೀಗಾ | ಪರಿ
ಹಾಸವೇಕೆ ನುಡಿಬೇಗ 11
ಪರಮಾತ್ಮನು ನಾ ಕೇಳೆ | ಎನ್ನ
ಮರತೆಯೇನೆ ಎಲೆ ಬಾಲೆ
ಅರಿತೆನೀಗ ಬಹು ಸಂತಸವಾಯಿತು
ಎರಗುವೆ ಚರಣಕೆ ನಾನು | ನಿನ್ನ
ಸರಿಯಾರೈ ದೊರೆ ನೀನು 12
ಧರೆಯೊಳಯೋಧ್ಯಾ ಪುರದರಸನ ಮಗ
ಗುರುರಾಮವಿಠಲನೆ ನಾನು | ಓ
ತರುಣಿ ನಿನಗೊಲಿದು ಬಂದೆನು
ಧರಣಿ ತನಯೆ ನಸುನಾಚಿಕೆಯಿಂದಲಿ
ಣಗಳನು ತೊಳೆದಳು ಬೇಗ 13

ಶಾರದೇಂದುಮುಖಿ ನೀರಜನಯನಳೆ
ಬಾರೆಲೆ ಬಾಗಿಲ ತೆಗಿಯಲೆ ಭಾಮೆ ಪ
ಯಾರಯ್ಯ ಬಾಗಿಲ ಹೊರಗೆ ನಿಂತಿರುವನು
ಜಾರ ಪುರುಷನಂತೆ ತೋರುವೆ ನೀನು ಅ.ಪ
ಜಾರನಾದರೆ ನಿಂಗೆ ಜಾರನಲ್ಲವೆ ಮೀನಾ
ಕಾರ ಧರಿಸಿರುವ ಹರಿಯಲೆ ಭಾಮೆ
ಮೀನನಾದರೇ ಬಲು ಮೌನದಲಿರದಂತೆ
ಮಾನವರಂತೆ ಮಾತು ಯಾವುದೋ ನಿನಗೆ 1
ಮಂದರಗಿರಿಯ ಬೆನ್ನಿಂದ ಧರಿಸಿರುವ
ಅಂದ ಕೂರ್ಮನಲ್ಲವೇನೆ ಭಾಮೆ
ಕೂರ್ಮ ನೀನಾದರೆ ಕೂಪದೊಳಿರುವುದೆ
ಧರ್ಮವೆಂಬುವುದನು ಮರೆತೆಯಾ ನೀನು 2
ನೀಲವೇಣಿಯೆ ಕೇಳೆ ಕೋಲರೂಪದಿ ಬಂದು
ಕ್ಷಿತಿ ತಂದೆನೆ ಭಾಮೆ
ಪೋತರೂಪನೇ ನಿಜ ಧಾತ್ರಿಯ ಭೇದಿಸಿ
ಗಾತ್ರ ರಕ್ಷಣೆ ಮಾಡು ಹೋಗೆಲೊ 3
ಸ್ತಂಭ ಭೇದಿಸಿ ರಿಪು ಡಿಂಭನ ಕಾಯಲು
ಜಂಭದಿ ಖಳನನು ಕೊಂದೆನೇ ಭಾಮೆ
ಸ್ಥಂಭ ಭೇದಿಸಿದ ನಾ ನಂಬುವುದಿಲ್ಲವೊ
ಡಂಭದಿ ಬಾಗಿಲು ಭೇದಿಸಿ ಬಾರೊ 4
ವಾಮನನೆಂದು ವಟುರೂಪದಿ ಬಂದು ಸಾರ್ವ
ಭೌಮನಲ್ಲಿ ಭೂಮಿ ಬೇಡಿದೆ, ಭಾಮೆ
ವಟುರೂಪನಾದರೆ ಕುಟಿಲಾಕ್ಷಿಯರಲಿಂಥ
ಚಾಟುವಚನಗಳು ಯಾಕೆಲೊ 5
ದುರುಳನೃಪರ ಪರಿಹರಿಸಿದ ಭೃಗುಮುನಿ
ವರಕುಲಜಾತ ಶ್ರೀ ರಾಮನೇ ಭಾಮೆ
ಮುನಿವರಸುತನಾಗಿ ಸ್ವನಿಯಮಗಳ ಬಿಟ್ಟು
ವನಿತೆಯರಲ್ಲಿಂಥಾ ಸರಸವೆ ನಿನಗೆ 6
ದಶರಥ ನೃಪತಿಯ ಮನೆಯೊಳವತರಿಸಿ
ದಶಶಿರರನು ಕೊಂದ ರಾಮನೆ ಭಾಮೆ
ಪರ ಕಾಮಿನಿಯರೊಳಿಂಥಾ
ಪ್ರೇಮ ಮಾಡುವುದುಂಟೆ ಯೋಚಿಸೊ ನೀನು 7
ನೀರಜಾಕ್ಷಿ ಕೇಳೆ ಜಾರಚೋರತೆಯಲ್ಲಿ
ಸಿರಿ ಕೃಷ್ಣನೇ ಭಾಮೆ
ಚೋರನಾದ ಮೇಲೆ ಸೇರಿಸುವುದು ಹೇಗೆ
ಭಾರಿ ಆಭರಣಗಳಿರುವುವೊ 8
ಮುಗ್ಧೆ ಕೇಳೆ ಇದಬದ್ಧವಲ್ಲದೆ ಅತಿ
ಶುದ್ಧನಾದ ಬುದ್ಧರೂಪನೆ
ಬುದ್ಧರೂಪನೆ ನಿನ್ನ ನಡತೆಯ ಕೇಳಲು
ಶುದ್ಧಿಯು ಲೋಕಪ್ರಸಿದ್ಧವು9
ಸರಸಿಜಮುಖಿ ವರತುರಗವನೇರಿದ
ನೃಪರ ಗೆಲ್ವ ಕಲ್ಕಿಯೇ ಭಾಮೆ
ದುರುಳ ಜನರು ಇಲ್ಲಿ ಸೇರುವುದಿಲ್ಲವೊ
ತರಳೆಯರಲಿ ದುಷ್ಟ ಕಾರ್ಯವೇ ಪೋಗೊ10
ಪರಿ ಸರಸವನಾಡುವ ನಾಮಗಿರಿ
ನರಹರಿ ರೂಪ ರಮಾ ರಮೇಶರು
ವಿಹರಿಪ ಬಗೆಯನು ಸ್ಮರಿಸುವ ಸುಜನರ
ಪರಮಪುರುಷ ಹರಿ ಪೊರೆವುದು ನಿಜ 11