ದತ್ತ ದಿಗಂಬರನೇ ವಂದಿಪೆ ನಾ ಕಾಯೈ ನೀ
ಕರುಣಾ ಸಾಗರ ವಲ್ಲಭರಾಮಾ
ಪಾಡುವೆನಾ ಹೇ ಜಗದೀಶಾ
ನೀಗುಸು ಆಶಾ ಬೇಡುವೆ ಶ್ರೀಶಾ
ವಿಷಯದೊಳಿರುವಾ ಈ ಘನಪ್ರೇಮಾ
ನಿನ್ನೊಳಗಿರಲೈ ನಿರ್ಗುಣಧಾಮಾ
ಸದ್ಗುರುನಾಥಾ ಹೇ ಅವದೂತಾ
ಸತ್ಯ ಸ್ವರೂಪಾ ನಿತ್ಯಾನಂದಾ

ಪಾಲಿಸೆನ್ನನು ಪಾಹಿ ಪಾರ್ವತೀಶ ಈಶ
ಕಾಲಕರ್ಮವಿದೂರಪಾಪನಾಶ ಪ
ಪರಮ ಪುರುಷ ಪರೇಶ ಪರಮಾತ್ಮ ಪರಿಪೂರ್ಣ
ವರ ಪರಂಜ್ಯೋತಿ ರೂಪಾತ್ಮನೇ
ಕರಿ ಚರ್ಮಧರ ಭಸ್ಮ ಭೂಷಣ ದಿಗಂಬರನೇ
ಶರಣು ಜನಸುರಧೇನು ನಿಸ್ಸಂಗನೇ 1
ಉಮೆಯರಸ ಪಂಚವದನ ನಿರ್ಮಲನೆ
ವಿಮಲತರ ಗಂಗಾಜೂಟಧರನೇ
ಅಮಿತಬಲ ವೃಷಭವಾಹನನೆ ಶಾಶ್ವತನೆ
ಕಮಲ ಪಿತ ಸುತ ಹರನೇ ಶಿವರೂಪನೇ 2
ವರವ್ಯಾಘ್ರ ಚರ್ಮಧರ ಇಂದುಶೇಖರ ಹರನೆ
ಕರದಿ ಡಮರುಗಧರನೇ ಶೂಲ ಪಾಣಿ
ಮೆರೆವ ನಾಗಾಭರಣ ಗಿರಿಜೆವರ ಯೋಗೀಶ
ಮೂರ್ತಿ ಶ್ರೀ ಶಂಭು ಶಂಕರನೆ 3

ವಂದನೆ ಗೈವೆನು ಗುರುವೆ ಚರಣಾರವಿಂದದ್ವಯಕೆ ಮಣಿವೆ
ನೀನೇ ಕಾಯೋ ಎನ್ನ ಸದ್ಗುರುವೆ ಪ
ಬಂದು ಸೇರಿದೆ ನಾನು ಕರುಣ
ಸಿಂಧುವೆ ಪಾಲಿಸುನೀನು
ಮಂದಮತಿಯು ಜಡಜೀವನು ನಾನು ವಸುಂ
ಧರೆಯೊಳಗೆ ಸುಜ್ಞಾನಿಯು ನೀನು 1
ಕಾರಗತ್ತಲೆಯೊಳಗೆ ಏನೆಂದು ತೋರದೆ ತೊಳಲಿದ ಹಾಗೆ
ದಾರಿ ಕಾಣದೆ ಕಂಗಾಣದವಗೆ ಕೃಪೆ
ದೋರಿ ಸುಜ್ಞಾನ ದೀಪವ ತೋರೋ ಗುರುವೆ 2
ಸೊಕ್ಕಿನ ಮದದಿಂದ ಕಾಲವ
ಪುಕ್ಕಟೆಕಳೆದೆ ಯೋಗೀಂದ್ರ
ದುಃಖವೆನಿಪ ಸಂಸಾರ ಶರಧಿಯೊಳು
ಸಿಕ್ಕಿದೆ ಕಾಯೋ ಸದ್ಗುರು ದಿಗಂಬರನೇ 3