ಶುಭವೀವ ನಿರುತದಲಿ ಮಂದಹಾಸಾ ಪ
ಅಭಯಗಿರಿಯ ವಾಸಾ ಶ್ರೀ ಶ್ರೀನಿವಾಸ ಅ.ಪ.
ಧೇನಿಪರ ಮನ ಚಿಂತಾಮಣಿಯೋ | ದೇವ |
ನೀನೆ ಗತಿಯೆಂಬುವರ ಧಣಿಯೋ ||
ಜ್ಞಾನಮಯ ಸುಖದ ಸಂದಣಿಯೋ | ಪುಣ್ಯ |
ಕಾನÀನವಾಸ ಸುರರ ಖಣಿಯೋ 1
ವಜ್ರ ಪಂಜರನೋ | ದೇವ |
ದುರುಳರಿಗೆ ವೀರ ಜರ್ಝರನೋ ||
ದುರಿತಕದಳಿಗೆ ಕುಂಜರನೋ |
ವರಕಲ್ಪ ಕಲ್ಪ ವಿಚಲನೋ 2
ಪರಮೇಷ್ಠಿ ಶಿವರೊಳಗೆ ಯಿಪ್ಪ | ದೇವ |
ಮರುತನ್ನ ಹೆಗಲೇರಿ ಬಪ್ಪಾ ||
ಶರಣರಿಗೆ ವರವೀಯುತಿಪ್ಪಾ |
ಸಿರಿ ವಿಜಯವಿಠ್ಠಲ ತಿಮ್ಮಪ್ಪಾ 3

ಹರಿಸರ್ವೋತ್ತಮನೆಂದರಸುವರು ಪ
ಹರಿದಾಸರಿವರು ಧರೆಯೊಳಿವರಿಗೆ
ಸರಿಗಾಣೆ ಕೇಳಮ್ಮ ಜಾಣೆ ಅ.ಪ
ಸಾಧುಸಜ್ಜನರಿಗೆ ಬಾಗುವರು
ವೇದಕೆ ನಮಿಸುವರು
ವಾದವಾಂಛಲ್ಯವ ತೊಡದಿಹ್ಯರು
ಭೇದಿಲ್ಲದಿವರು 1
ಕಾಮ ಕ್ರೋಧಾದಿಗಳು ಜೈಸಿಹ್ಯರು
ತಾಮಸಬಿಟ್ಟಿಹರು
ಭೂಮಿ ಮೋಹಾದಿಗಳನಳಿದಿಹ್ಯರು
ಸ್ವಾಮಿನ ಭಜಿಸುವರು 2
ಕ್ಲೇಶಪಂಚಕದಿಂದುಳಿದಿಹ್ಯರು
ಮೋಸಕೆ ಒಳಪಡರು
ಅಶಪಾಶಗಳೆಲ್ಲ ತುಳಿದಿಹ್ಯರು
ವಾಸನೆ ತೊಳೆದಿಹ್ಯರು 3
ಮೆಚ್ಚದೆ ಸಂಸಾರ ತುಚ್ಛೀಕರಿಸಿಹ್ಯರು
ಎಚ್ಚರಗೊಂಡಿಹ್ಯರು
ಅಚ್ಚುತಾನಂತನೆ ಗತಿಯೆಂಬುವರು
ಬಚ್ಚಿಟ್ಟು ನೆನೆಯುವರು 4
ಹರಿಯೆ ಪರದೈವವೆಂದರಿತಿಹ್ಯರು
ಹರಿಯ್ಹೊರತಿಲ್ಲೆಂಬುವರು
ಸರುವ ಜಗಭರಿತನೆಂದವರು
ಸಿರಿರಾಮನ್ನ ತಿಳಿದಿಹ್ಯರು 5