ಮಂಗಳ ಜಯ ಮಂಗಳ
ಮಂಗಳ ಶ್ರೀ ನರಸಿಂಗ ಮೂರುತಿಗೆ ಪ
ಅಂಗುಟಾಗ್ರದಿ ಗಂಗೆಯ ಪಡೆದ
ಗಾತ್ರ ಶ್ರೀ ರಂಗನಿಗೆ
ಅಂಗಜರಿಪು ಧನು ಭಂಗವ ಮಾಡಿ ಸೀ-
ತಾಂಗನೆಯಳ ಕರಪಿಡಿದವಗೆ 1
ವರಮತ್ಸ್ಯಗೆ ಗಿರಿಧರ ಕ್ರೋಢಗೆ
ತರುಳನ ರಕ್ಷಿಸಿ ಧರೆಯ ಬೇಡಿದಗೆ
ಪರಶು ಧರಿಸಿದ ರಾಮಕೃಷ್ಣಗೆ
ಧರಿಸದೆ ವಸನವ ತುರಗನೇರಿದಗೆ 2
ಕರಿವರ ಕರೆಯಲು ಭರದಿ ಬಂದವಗೆ
ಸ್ಮರಿಪರ ಭಯ ಪರಿಹರಿಸುವ ದೇವಗೆ
ಶರಣು ಜನಕೆ ಸುರತರುವೆಂದೆನಿಸಿದ
ಸಿರಿ ಕಾರ್ಪರ ನರಹರಿ ರೂಪಗೆ 3

ಹರಷದಿ ತಾ ಸಖಿ ತ್ವರದಿ ಆರುತಿಯ
ದ್ವಿರದ ವರದ ಶಿರಿನರಹರಿಗೆ ಪ
ನಿಗಮ ತಂದವಗೆ ನಗಧರ ಕ್ರೋಢಗೆ
ಮಗುವಿನ ಸಲಹಿ ಜಗವ್ಯಾಪಿಸಿದಗೆ
ಭೃಗುಜಾ, ರಘುಜಾ ವ್ರಜಜಾರ್ತಿ
ಹರಣ ವಿಗತವಸನ ತುರುಗನೇರಿದಗೆ 1
ಗರುಡ ಗಮನಗೆ ಶರಧಿಶಯನಗೆ
ಸುರನದಿ ಪಿತ ಭೂಸುರ ಪ್ರಿಯಗೆ
ಅರುಣಾ, ಚರಣಾ ಕರುಣಾಕರಮಂ-
ದರಧರ ಶರಣರ ಪೊರೆವ ಸಿರಿವರಗೆ 2
ಛಳಿಮಳೆ ಸಹಿಸುತ ಛಲದಲಿಧೇನಿಪ
ಬಲುವಿಧ ಭಕ್ತಾವಳಿ ಹೃನ್ಮಧ್ಯದಿ
ಪೊಳೆವಾ, ನಲಿವಾ ಕಳೆವಾಘವ ಭೂ-ವಲಯದಿ ಕಾರ್ಪರ ನಿಲಯ ನರಹರಿಗೆ 3