ಬಾರೆ ಪಾರ್ವತಿ ಸಾರೆ ಸುಖವ
ತೋರೆ ನಿನ ದಯವ ಪ
ಬಾರಿ ಬಾರಿಗು ಪ್ರಾರ್ಥಿಸುವೆನೆ
ಸಾರಸಾಕ್ಷಿಯೆ ಸರ್ಪವೇಣಿಯೆ ಅ.ಪ
ದಕ್ಷಕುವರಿಯೆ ಈಕ್ಷಿಸೆನ್ನನು-
ಪೇಕ್ಷೆ ಮಾಡದಲೆ
ಅಕ್ಷಿತ್ರಯನ ಸತಿಯೆ ಭಕ್ತರ
ಕಷ್ಟ ಬಡಿಸುತಲಿ
ಸೂಕ್ಷ್ಮ ಮತಿಯನಿತ್ತು ಕೃಷ್ಣನ
ಸ್ತೋತ್ರಗಾನದಲಿ ಅ-
ಪೇಕ್ಷೆಯೊದಗುವ ಮನವ ಪಾಲಿಸು
ರಕ್ಷಿಸೀಗಲೆ ಭಕ್ತವತ್ಸಲೆ 1
ಮಂದಗಮನೆ ಮತ್ತೊಂದು ಪೇಳುವೆ
ನಂದಿವಾಹನನಾ
ಮುಂದೆ ಸ್ತುತಿಪ ಭಕ್ತವೃಂದ ವಿ-
ದೆಂದು ಪೇಳಿದೆ ನಾ
ಸುಂದರ ಶ್ರೀ ಹರಿಯ ಸೇವೆಗೆ
ಪೊಂದಿಸೆನ್ನ ಮನ
ಚಂದದಿಂದ ಪ್ರಾರ್ಥಿಸುವೆನೆ
ಸುಂದರಾಂಗಿಯೆ ನಿನ್ನನನುದಿನ 2
ಕಮಲನೇತ್ರೆಯೆ ವಿಮಲ ಸದ್ಗುಣಗುಣಿಯೆ ಪಾರ್ವತಿ
ಕಮಲಸಂಭವ ಭವಸುರಾರ್ಚಿತನ
ಸ್ಮರಿಸುವ ಮತಿ ಹೃ-
ತ್ಕಮಲದೊಳಗೆ ನಿಲಿಸುವಂತೆ
ಮಾಡು ಸದ್ಗತಿ
ಕಮಲನಾಭ ವಿಠ್ಠಲ ಕೊಡುವ
ನೆನುತ ಕೀರುತಿ 3

ಭಾರತೀ ದೇವಿ
ಪಾಲಿಸು ಭಾರತಿಯೆ ದೇವಿಯೆ
ಕಾಲಮಾನಿಯ ತಾಯೆ ಪ
ಶ್ರದ್ಧಾ ಮೂರುತಿ ತಾಯೆ ಕಾಯೆ ಪ್ರದ್ಯುಮ್ನ ಕುವರಿಯೆ
ಶ್ರದ್ಧಾನಾಮಕಳೆ ನೀ ಶ್ರದ್ಧಾಭಕುತಿ ಕೊಟ್ಟು
ಶುದ್ಧ ಮುಗ್ಧನೆನ್ನ ಉದ್ಧರಿಸುವುದೀಗಾ 1
ಚಿತ್ತ ವೃತ್ತಿಯ ಬಲ್ಲೆ ಎನಗೆ ನೀ ಉತ್ತಮಗತಿ ಈಯೆ
ಚಿತ್ತಶುದ್ದ ಬುದ್ಧಿಯಿತ್ತು ನೀ ಪಾಲಿಸಿ
ಚಿತ್ತಜನಯ್ಯನಾ ಹತ್ತಿರಕೊಯ್ಯೆ 2
ಪಂಕಜ ಭವನ ರಾಣಿ ಗುಣಮಣಿ ಶಂಕರನಾ ಜನನಿ
ಕಿಂಕರನೆಂದು ಮನ ಶಂಕೆಯ ಹರಿಸಿ ಶ್ರೀ
ವೆಂಕಟೇಶನ ಪಾದಪಂಕಜ ತೋರಿಸೆ3