ಪರಮಪುರುಷ ಶ್ರೀ ರಾಮನ ಪದಯುಗ
ಸಿರಿರಮಣ ನಿಜದಾಸನೆಂದೆನಿಸಿದ
ವರ ಕದರುಂಡಲಿ ಹನುಮಂತ ಪ.
ಒಂದೇ ಮನದಲಿ ತಂದೆ ನಿನ್ನಡಿಗಳ
ಪೊಂದಿದೆ ಸಲಹೈ ಹನುಮಂತ
ಕುಂದುಗಳೆಣಿಸದೆ ಕಂದನ ತೆರದಲಿ
ಎಂದೆಂದಿಗು ಪೊರೆ ಹನುಮಂತ 1
ವಾರಿಧಿ ದಾಟುತ ಸೇರುತ ಅರಿಪುರ
ಧಾರುಣಿಜೆಯ ಕಂಡೆ ಹನುಮಂತ
ನಾರಿಚೋರನಪುರ ಸೇರಿಸಿ ಅನಲಗೆ
ಸೇರಿದೆ ರಾಮನ ಹನುಮಂತ 2
ಕೃಷ್ಣನ ಸೇವಿಸಿ ದುಷ್ಟರ ಕೊಲ್ಲುತ
ಮೆಟ್ಟಿದೆ ಖಳರನು ಹನುಮಂತ
ದಿಟ್ಟತನದಿ ಸಾಮ್ರಾಜ್ಯವಾಳಿ ಜಗ-
ಜಟ್ಟಿ ಎಂದೆನಿಸಿದೆ ಹನುಮಂತ 3
ಮಿತಿಯಿಲ್ಲದ ಅತಿಖತಿ ಮತಗಳನು
ಹತಗೈಸುತ ನೀ ಹನುಮಂತ
ಪ್ರತಿ ಗ್ರಂಥಗಳನ್ನು ಸ್ಥಾಪಿಸಿ ಸುರರಿಗೆ
ಅತಿ ಹಿತ ತೋರಿದೆ ಹನುಮಂತ 4
ಇಷ್ಟ ಫಲಪ್ರದ ತುಷ್ಟಿಬಡಿಸೊ ನೀ
ಕೊಟ್ಟೀಗಭಯವ ಹನುಮಂತ
ದಿಟ್ಟ ನಿನ್ನಡಿಗಳ ಭಜಿಸುವೆ ಗೋಪಾಲ
ಕೃಷ್ಣವಿಠ್ಠಲ ಪ್ರಿಯ ಹನುಮಂತ5

ರಾಮಾನುಜಾಚಾರ್ಯ ಮೌನಿವರ್ಯ
ನೇಮದಿಂದಲಿ ಗೈದೆ ನೀಂ ಸ್ವಾಮಿ ಕಾರ್ಯ ಪ
ಆದಿಯೊಳು ನೀನಾದಿಶೇಷನು ಹರಿಶಯ್ಯೆ
ಮೋದಕರ ಪ್ರಹ್ಲಾದ ಎಂದೆನಿಸಿದೆ
ಸೋದರದಿ ಸೌಮಿತ್ರಿ ಸಂಕರ್ಷಣನು ಆದೆ
ನಾಥ ಯಾಮಾನ ಪಥದಿ ಅರಿಗಳನು ಗೆಲ್ದೆ 1
ಗೀತ ಸೂತ್ರಕೆ ಭಾಷ್ಯಕಾರ ನೀನಾಗಿರುವೆ
ಖ್ಯಾತಿಸಿದೆ ವ್ಯಾಸ ಪರಾಶರರ ಹೆಸರ
ಪೂತ ಆಳುವಾರುಗಳ ಶ್ರೀಸೂಕ್ತಿ ಪ್ರಕಟಿಸಿದೆ
ಮಾತೆವೊಲು ಉಭಯವೇದಗಳ ಪೊರೆದೆ 2
ನೂರೆಂಟು ತಿರುಪತಿಯ ಯಾತ್ರೆಗಳ ಮಾಡುತ್ತ
ದಾರಿತೋರಿದೆ ಹರಿಯ ಸೇವಿಸುವ ಪರಿಯ
ಪರಮಾರ್ಥಿಕರಾಗಿ ಪರಮವೈಷ್ಣವರಿರಲು
ಸಾರಸುಖ ಪದತೋರ್ದೆ ಯತಿಸಾರ್ವಭೌಮ 3
ಎಂದೆಂದು ಮರೆಯದ ಕೂರೇಶರಾ ಸಖ್ಯ
ಅಂದು ಬೋಧೆಯ ಕೊಟ್ಟ ಪೂರ್ಣಾರ್ಯರ
ನೊಂದಕಾಲವ ನೆನೆದು ಕಣ್ಣೀರ ಕರೆಯುವೆನು
ತಂದೆ ಗುರುವಿನ ಗುರುವೆ ದೇವಮಾನ್ಯ 4
ಯಾದವನ ಚೋಳನ ಕೃತ್ರಿಮದ ಕೋಟೆಗಳು
ಮಾಧವನ ಡೆಲ್ಲಿಯಿಂ ಕರೆತಂದುದು
ಬಾಧಿಸದೆ ಬ್ರಹ್ಮಪೀಡೆಗಳು ಓಡಿದುದು
ಈ ಧರೆಯ ಕೀರ್ತಿಗೆ ಮೊದಲಾದವು 5
ರಾಮಚಂದ್ರನ ಕಾಡವಾಸವಂ ನೆನಪೀವ
ಸ್ವಾಮಿಯರು ಗಿರಿಸೇರ್ದ ಗುರಿ ಎಲ್ಲವೂ
ತಾಮಸರು ಸಾವಿರರ ಒಂದೆ ವಾರದಿ ಗೆಲ್ದ
ಮಾಮೈಮೆ ಯಾರಿಗಿದೆ ಭೋಗಿರಾಜಾ 6
ಸಿರಿರಂಗ ತಿರುಪತಿ ಕಂಚಿ ಯದುಶೈಲಗಳ
ಪರಮಪದಕೂ ಮಿಗಿಲು ವೈಭವವ ಗೈದೆ
ನಿರುತ ತಮ್ಮವರಿಂಗೆ ಸಕಲ ಪಾಪವ ಸುಟ್ಟು
ಹರಿಯ ಭರವಸೆ ಪಡೆದೆ ಮೋಕ್ಷ ಕೊಡುವಂತೆ 7
ನಿನ್ನಂತೆ ನಡೆವ ಪ್ರಪನ್ನರೇ ಧನ್ಯರು
ಮನ್ನಣೆಯ ಪಡೆದಿರವ ಶ್ರೀಮಂತರು
ಎನ್ನ ಬಿನ್ನಪ ಕೇಳಿ ನಿನ್ನವನ ಮಾಡಿಕೋ
ಮೂರ್ತಿ ಜಾಜೀಶ ಕೀರ್ತಿ 8