ಬಂದ ಶ್ರೀ ಹರಿ ಬಂದ ಪ
ಬಂದ ಬಂದ ಮುಚುಕುಂದ ಪರದ ಅರ-
ವಿಂದನಯನ ಗೋವಿಂದ ಪರಾತ್ವರ
ಕಂದನೆನ್ನ ಮನ ಮಂದಿರಕೀಗಲೆ
ನಂದವ ನೀಡುತ ಇಂದಿರೆಸಹಿತದಿ ಅ.ಪ.
ಪೊತ್ತವ ಬಂದ
ಅಜಿತನುಬಂದ
ಚಾರುವರಾಹನು ಭೂಸಹಬಂದ ಪೋರನ ಸಲಹಿದ
ಘೋರನು ಬಂದ
ಭಾರ್ಗವ ಬಂದ
ಕೌರವವಂಶಕುಠಾರನು ಬಂದ
ಕಲ್ಕಿಯು ಬಂದ 1
ಉಸುರಲು ಹಯಮುಖಬಂದ
ದತ್ತನುಬಂದ
ನೀಡಲು ಯಜ್ಞನುಬಂದ
ಸಾಧುಹರಿನಾರಾಯಣ ಬಂದ
ಶಿಂಶುಮಾರನು ಬಂದ
ಧನ್ವಂತ್ರಿಯು ಬಂದ 2
ಶ್ರೀ ವಿಷ್ಣುವು ಬಂದ
ಉಲ್ಲಾಸದಿ ಬಂದ
ಸಂತೋಷನು ಬಂದ
ತೈಜಸ ಕರುಣದಿ ಬಂದ
ಮುಕ್ತೇಶನು ಬಂದ
ಪರಾದ್ಯನಂತನು ಬಂದ 3
ಜಗನೂಕೂವ ಬಂದ
ಪುರುಹೂತ ವಿನುತ ಸಕಲಾರ್ತಿಹರ ತಾ ಬಂದ
ವೈರಾಜ್ಯನು ಬಂದ ಶೃತಿ-
ನೀಕ ಸುವಂದಿತನಿರುಪಮ ಬಂದ ವಾಕುಮನಕೆ
ಸಾಕಲ್ಯಸಿಗದ ಪುಣ್ಯ-
ವಿವರ್ಜಿತ ಭಗಲೋಕೈಕ ವಂದ್ಯ
ನಿಜಭಕ್ತಗಣ ಜಯಪರಾಕುನುಡಿಯುತಿರೆ ಮೆಲ್ಲ ಮೆಲ್ಲಗೆ4
ಸರ್ವಸಾಕ್ಷಿಗಭೀರ ಪರಾಕು
ಸ್ವತಂತ್ರನೆ ಪರಾಕು
ಸರ್ವರಪಾಲಿಪ ಸರ್ವರ ರಕ್ಷಿಪ ಸರ್ವಚರಾಚರಭಿನ್ನ ಪರಾಕು
ಪ್ರತಿಪಾದ್ಯಪರಾರು
ಸರ್ವಕಾಲದಲಿ ಸರ್ವದೇಶದೊಳು ಸರ್ವದೆಶೆಯೊಳು
ಸಮನೆ ಪರಾಕು
ಪರಾಕು 5
ನಿತ್ಯಾನಿತ್ಯಜಗಜ್ಜನಕ ಸರ್ವೋತ್ತಮ ಸತ್ಯಸಂಕಲ್ಪ ಪರಾಕು
ನಿಖಿಳಪ್ರದಾಯಕ ಪರಾಕು
ಭೃತ್ಯಾನುಗ್ರಹ ಕಾರಕಶೀಲ ಸದಾಪ್ತತಮ ವಿಶ್ವಾತ್ಮನೆಪರಾಕು
ನಿತೈಶ್ಪರ್ಯ ಕೀತ್ರ್ಯಾತ್ಮಕ ಸರ್ವಾತತ ಬಲವಿಖ್ಯಾತಪರಾಕು
ನೀತ ಜ್ಞಾನಾನಂದ ಪರಿಪೂರ್ಣನಿತ್ಯತೃಪ್ತ ಮಹಾಂತ ಪರಾಕು
ಪರಾಕು 6
ಪರಾಕು ರೂಪಾತ್ಮ ಪರಾಕು
ಪುರುಷ ಸೂಕ್ತ ಸುಗೇಯ
ಪ್ರಖ್ಯಾತ ಮಹಾಮಹಿಮ ಪರಾಕು
ನಾಮಕ ಪರಾಕು
ಸುನಾಮ ಓಂಕಾರಾಧಿಪ ಪರಾಕು
ವಿಭೂತಿ ಪರಾಕು 7
ಪ್ರೇಮ ಚೊಕ್ಕ ಸೃಷ್ಟಿಗೈವನಿತ್ಯಸುನೇಮ
ಕರುಣಾಮಣಿ ಶ್ರೀಕಾಮ
ಅಕ್ಕರೆಯಲಿ ಜಗಕಾವ ನಿಸ್ಸೀಮ ಮುಕ್ಕಣ್ಣ ವಿಧಿಸಿರಿ ಸಾರ್ವಭೌಮ
ವಿನುತ ಗುಣಲಲಾಮ
ಸುನಾಮ ಮೇಘಶ್ಯಾಮ 8
ಸುಂದರ ಬಂದ
ಸೃಷ್ಠಿಸ್ಥಿತಿಲಯಗೈವ ಮು-
ವೃಂದಕಳೆದು ನಿಜ-
ಸುಧಾರ್ಣವ ಬೃಹತೀನಾಮಗ
ಮಂದಸ್ಮಿತ ವದನವ ತೊರುವ ಈತನು ಸ್ಯಂದನವೇರಿಹ
ಜಯಮುನಿಹೃದಯಗ ಮಧ್ವರಮಾವರ ಶ್ರೀಕೃಷ್ಣವಿಠಲನು
ಭವ ಪರಿವಾರದ ಕೂಡಿಯೆ ಬಂದಾ 9

ಬಲು ತಿಗಡೋ ಇದು ಬಲು ತಿಗಡೋ
ಗಲಿಬಿಲಿ ಸಂಸಾರ ತಾರತಿಗಡೋ ಪ
ತಿಳಿಯದರು ಎಲ್ಲ ಅಳಿದರೊಳಗೆ ಬಿದ್ದು
ತಿಳಿದವರು ಗೆಲಿದರೀಮೊಲೆಮುಡಿಯೊ ಅ.ಪ
ಅಲಕುಮಲಕು ಇದು ಬಲುತಂಟೋ ಜರ
ಸಿಲುಕಲು ಬೀಳ್ವುದು ಕಗ್ಗಂಟೋ
ಸೆಳೆದು ಮಾಯದಿಂ ಒಳಗೆ ಹಾಕಿಕೊಂಡ
ಬಳಿಕ ಬಿಚ್ಚದಿದು ಬ್ರಹ್ಮಗಂಟೋ 1
ಎಣಿಕೆಗೆ ಮೀರಿದ ಹಳೆ ಗುದ್ದೋ ಇದು
ಘನ ಘನ ಜನರನು ನುಂಗಿದ್ದೋ
ಗುಣಿಸಿ ನೋಡದೆ ಮರ್ತು ಹಣಿಕಿಹಾಕಲಿದು
ಕುಣಿ ಕುಣಿಸಿ ಕೊಲ್ಲುವ ಮೆಚ್ಚು ಮದ್ದೋ 2
ಆರಿಗೆ ತಿಳಿಯದು ಇದರ್ಹೊಲಬೋ ಜಗ
ದ್ಹಾರಿಬಿದ್ದರಪ್ಪ ಸುತ್ತಿ ಮೆಚ್ಚೋ
ಧೀರ ಶ್ರೀರಾಮನ ಚಾರುಚರಣಕ್ಕೆ
ಸೇರಿದವರಿಗೊಂದೆ ಬಲು ಸುಲಭೋ 3

ಬಾರಮ್ಮಾ ಬಾರಮ್ಮಾ ಭಾಗ್ಯದನಿಧಿಯೇ
ತೋರಮ್ಮಾ ತೋರಮ್ಮಾ ಕರುಣಾನಿಧಿಯೇ ಪ.
ಬಾರಮ್ಮಾ ಮಹಲಕ್ಷ್ಮಿ ತೋರುತ ಕರುಣವ
ಬೀರುತ ತವಕದಿ ಸೇರುತ ಪತಿಸಹ ಅ.ಪ.
ಶ್ರೀ ರಮಾದೇವಿ ಇನ್ನಾರು ಸಮನಾಗರೇ
ಭೂ ರಮೇಶನ ಸೇವೆಗೆ ನಿಲ್ಲಲು
ಬಾರಮ್ಮಾ ಭಕ್ತರುದ್ಧಾರ ಮಾಡಲು ಎಲ್ಲಾ
ಕಾರಳು ನೀನಾಗಿ ವಾರುಧಿಶಯನಗೆ ಸೇವಿಸಲು
ಘೋರತರ ಸಂಸಾರ ಸಾಗರ ಪಾರುಗಾಣಿಪ
ಹರಿಯು ನಿನ್ನೊಳು ಸೇರಿಯಿರುತಿಹನೇ
ತೋರಿ ಭಕ್ತರಿಗೆ ಚಾರುಕಮಲ ಕರಾರವಿಂದದಿ
ಧೀರೆಯೆತ್ತುಪಕಾರ ಮಾಡಲು ವಾರಿಜಾಕ್ಷಿಯೆ ಸಾರುತೀಗಲೆ 1
ಪುಲ್ಲಲೋಚನೆ ನಿನ್ನ ಗಲ್ಲ ಮಿಂಚಿನ ಸೊಬ
ಗೆಲ್ಲ ನೋಡುತ ನಿನ್ನ ಒಡನಾಡುವ
ಪಲ್ಲವಾಧರೆ ನಿನ್ನ ವಲ್ಲಭ ಹರಿಯಲ್ಲಿ
ಎಲ್ಲ ಭಕ್ತರ ಮನಸಲ್ಲ ಅರುಹು ತಾಯೆ
ನಿಲ್ಲದೆಲೆ ಕಾನಲ್ಲಿ ಇಹ ಹರಿ ಎಲ್ಲಿ ಭಕ್ತರು ಕರೆ
ದಲ್ಲಿ ಬರುತಿಹನೆ ಮಲ್ಲಮರ್ಧನ ಶ್ರೀ ನಲ್ಲ ಕೃಷ್ಣನು
ಚೆಲ್ಲಿ ಕರುಣವ ಬಲ್ಲೆ ನಿನಪತಿ ಗುಣಗಳನೆಲ್ಲ ಕಾಯೆ 2
ರಂಗನರ್ಧಾಂಗಿಯೆ ಮಂಗಳ ಮೂರುತಿ ನಿ
ನ್ನಂಗಜನಯ್ಯನ ಕಾಣೆ ಕಾಯೆ
ಗಂಗಜನಕ ಸಹ ಸರ್ವರಂಗದೊಳಿದ್ದು ನೀ
ರಂಗನ ಲೀಲೆಯತಿಸಂಭ್ರಮದಲಿ ನೋಳ್ಪೆ
ತುಂಬುರು ನಾರದರು ಪಾಡಲು
ರಂಭೆ ಊರ್ವಶಿ ನಾಟ್ಯವಾಡಲು
ಸಂಭ್ರಮದಿ ಶ್ರೀ ಶ್ರೀನಿವಾಸನ್ನ ಇಂಬತೋರಿಸೇ
ಅಂಬುಜಾಕ್ಷಿಯೇ ಬೆಂಬಿಡದೇ ಎನ್ನ
ನಂಬಿರುವೇ ನಿನ್ನ ಕಂಬುಕಂಧರೆ
ಕುಂಭಿಣೀಪತಿ ಸಹಿತ ಬೇಗನೆ 3

ಬಾರವ್ವ ಮಹÀಭಾಗ್ಯದಭಿಮಾನಿ
ಶ್ರೀಹರಿ ನಿಜರಾಣೀ ಪ
ಸಾರಿದೆ ನಿನಪಾದನೀರಜಯುಗ ಮನೋ -
ವಾರಿಜದಲಿ ನೀ ತೋರುತ ಲಕುಮಿ ಅ.ಪ
ಅಖಿಲಾಗಮವಿನುತೆ ಎನ್ನಯ ಮಾತೆ ಸಕಲಸುರಗೀತೆ
ನಿಖಿಲಾ ತ್ರಿಜಗದ್ವ್ಯಾಪ್ತೆ ಪ್ರಖ್ಯಾತೆ ಸಂಪತ್ಪ್ರದಾತೇ
ನಖಮುಖ ಮಾತ್ರದಿ ವಿಖನಸಆಂಡದ
ಅಖಿಲವ್ಯಾಪಾರವ ಸುಖದಲಿ ಮಾಡುವಿ 1
ಇಷ್ಟಾರ್ಥವ ಸಲಿಸಿ ಎನ್ನನು ಪೊರೆಯೇ
ಕೊಲ್ಹಾಪುರÀ ಶಿರಿಯೆ
ಅಷ್ಟ್ಟದಾರಿದ್ರÀ್ಯಗಳನು ನೀ ತರಿಯೆ
ಈ ಕ್ಷಣ ಸುಖಸುರಿಯೇ
ಅಷ್ಟಪÀÀದೋದರ ಅಷ್ಟಮೂರ್ತಿನಿನ್ನ
ದೃಷ್ಟಿಯಿಂದ ಮಹಶ್ರೇಷ್ಟನಾಗಿಹನೇ 2
ಕ್ಷೀರಾವಾರಿಧಿಯೊಳು ಸಂಜಾತೆ ಮಾರನ್ನ ಮಾತೆ ಅ -
ಪಾರಾಮಹಿಮಾಳೆ ಸುರಸನ್ನುತೆ ಜಗದೊಳಗೆ ಖ್ಯಾತೆ
ವಾರವಾರಕೆ ದುರಿತಾರಿ ನಿನ್ನಯ ಪೂಜೆ
ಚಾರುಮನದಿ ಮಾಳ್ಪೆ ಧೀರೆ ಉದಾರೆ 3
ವಾಸವಾಗೆನ್ನಾ ಮನೆಯೊಳಗಿನ್ನಾ ಪಾಲಿಸೆ ಇದನನ್ನಾ
ವಾಸವಾದಿ ಸುರರಾಸೆಯ ಪೂರ್ತಿಸಿ
ಈಶರ ಮಾಡಿದಂತೆ ಈ ಸಮಯದಿ ಎನ್ನ 4
ನಗೆಮೊಗ ಚೆನ್ನೆ ಸುಪ್ರಸನ್ನೆ ಸುರನಿಕರರನ್ನೆ
ಮಗುವಿನ ಮಾತೆಂದು ನಗುತ ನೀ ಇನ್ನೆ
ಬಾ ಬರುವದು ಘನ್ನೆ
ನಗಹರ ಸುರಪನ ಮಗನನ ಸಖ ಗುರು
ಜಗನ್ನಾಥ ವಿಠಲ ಸಮ್ಮೊಗವಾಗಿ ಬೇಗ ನೀ 5
ಶಿರಿದೇವಿ ನಿನ್ನ ಚರಣ ಸರಸಿಜಯುಗಕೆ
ಶಿರದಿ ನಮಿಪೆ ಸತತ ಸರಸಿಜಾಂಬಕೆ
ಸರಿಯಾರು ನಿನಗೀ ಸರಸಿಜಭವಾಂಡದೊಳು
ಸgಸಿಜಾಕ್ಷಗೆ ದೇಶಕಾಲಗಳಿಂದ ಸರಿಯಾಗಿ ನಿತ್ಯದಲಿ
ಪರಿಪರಿಸೇವಾದಿಂದ ಹರಿಯಾ ಮೆಚ್ಚಿಸಿ
ಪರಮಾದರದಿಂದ ಪತಿಗನುಕೂಲ -
ಪರಳಾಗಿ ಸೃಷ್ಟಿಗೆ ಮೂಲಕಾರಣಳೆನಿಸಿ
ಪರಮೇಷ್ಟಿ ಮೊದಲಾದಾನಂತಜೀವರನ್ನ
ಅರಿತು ಯೋಗ್ಯಾಯೋಗ್ಯತೆಯನ್ನನು -
ಸರಿಸಿ ಸೃಜಿಪ ಶಕ್ತಿ ನಿನಗುಂಟು ನೀ
“ಯಂ ಯಂ ಕಾಮಯೆ ತಂ ತಮುಗ್ರಂ ಕೃಣೋಮಿ”
ಎಂತ ಶ್ರುತಿ ಸಾರುತಿದೆ
ಶಿರಿ ನಿನ್ನ ಕಟಾಕ್ಷದಿ ಸಕಲೈಶ್ವರ್ಯಗಳು
ಪರಿಪರಿ ವಿಧದಿಂದ ಒದಗುತಿಪ್ಪವು
ಹರಿಕೃಪೆ ನಿನ್ನೊಳಗೆಂತಿಹುದೋ
ಅರಿಯಾರು ಎಂದಿಗು ಬೊಮ್ಮಾದಿಸುರರು
ನರರೇನು ಬಲ್ಲರಮ್ಮ ನಿನ್ನ ಮಹಿಮೆಯ
ಶಿರಿಮಾನಿ ಎನ್ನ ನೀನು ಕರುಣದಿಂದಲಿ ನೋಡಿ
ಹರಿಮೂರ್ತಿಯನ್ನೇ ತೋರೆ ಹರಿಣಲೋಚನೆ
ಹರಿದಾಸಜನರೊಡೆಯ ಗುರುಜಗನ್ನಾಥವಿಠಲನ್ನ
ಇರವು ತೋರಿಸಿ ಎನ್ನ ಪೊರೆಯಮ್ಮ 6

ಬಾರೆ ಬೇಗನೆ ವಾರಿಜಾಮುಖಿ
ಚಾರುವೇದಕೆ ನೀ ಬಾ ಬೇಗನೆ ಪ
ಕನಕಾಂಬರವನುಟ್ಟು ‌ಘನಕಂಚುಕವ ತೊಟ್ಟು
ಹಣೆಗೆ ತಿಲಕವಿಟ್ಟು ವನಜಾಜಿ ಮಲ್ಲಿಗೆಯಾ
ಮುಡಿಯುತ ನೀ ಬೇಗನೆ ಬಾ 1
ಲುಲ್ಲ ಪೈಜಣದಿ ಘಿಲ್ಲು ಘಿಲುರೆನುತಲಿ
ನಿಲ್ಲದೆ ಉಲ್ಲಾಸದೀಗ |
ಬೇಗ ಫುಲ್ಲನಯನೆ ಬಾ 2
ಕಾಮನ ಶಿರೋಮಣಿ ಕಾಮನ ಕರುಣಿ
ಶಾಮಸುಂದರನ ರಾಣಿ ನೀ ಬೇಗೆನ
ಪ್ರೇಮದಿಂದಲಿ ಬಾ 3

ಬಾರೆಂದು ಹಸೆಗೆ ಕರೆವೆÀನು
ಕ್ಷೀರಾಬ್ಧಿಶಯನನೆ ಸಾರಸನಯನನೇ ಪ.
ಕ್ಷೀರಾಬ್ಧಿಜಾವರ ಮೇರುಗಂಭೀರನೆ
ನೀರಜಭವಪಿತ ಮಾರಹರಾರ್ಚಿತ
ಚಾರುನೀರದಗಾತ್ರ ಪರಮ ಪವಿತ್ರ ಅ.ಪ
ಧರಣೀಸುರರ ಮೊರೆಗಳನಾಲಿಸಿ
ಧರೆಯೊಳಗವತರಿಸಿ ನರರೂಪಧರಿಸಿ
ಧರಣಿಪ ದಶರಥತರಳನೆಂದೆನಿಸಿ
ಧರೆಯ ಭಾರವನಿಳಿಸಿ ಕರುಣಿಸು ಮನವೆರಸಿ 1
ಅಸುರೆ ತಾಟಕಿಯ ಅಸುವನಳಿದು ದುಷ್ಟ
ನಿಶಿಚರರನು ಸದೆದು ಅನುಜನೊಡಗೊಂಡು
ಕುಶಿಕನಂದನನ ಕ್ರತುವನು ತಾ ಕಾಯ್ದು
ಅಸಮ ಶೂರನೆನಿಸಿ ಅಮರರ ಮನತಣಿಸಿ 2
ಶಿಲೆಯ ಶಾಪವಕಳೆದು ಲಲನೆಯ ಪೂಜೆಗೊಲಿದು
ಬಲುಹಿನಿಂದಲೆ ಬಂದು ಹರಧನು ಮುರಿದು
ಲಲನೆ ಜಾನಕಿಯ ನಲವಿನಿಂ ಕೈಪಿಡಿದು
ಬಲುಗರ್ವಿತ ಭಾರ್ಗವ ಮದಮುರಿದೆ ಸಲಹೆನ್ನ 3
ಈಶವಿನುತ ಶ್ರೀ ಶೇಷಾಚಲ ನಿಲಯನೆ
ದಾಸರಮನದೊಳು ವಾಸವಾಗಿಹನೇ
ವಾಸವಾದ್ಯಮರ ಪೋಷಕನೆನಿಸಿಹನೆ
ಭಾಸುರವದನನೆ ಶ್ರೀಸತೀಸದನನೆ ನೀಂ ನಲಿದು 4

ಬಾರೊ ಶ್ರೀವೆಂಕಟರಮಣ ತವಪಾ-
ದಾರಾಧಕರನು ಪೊರೆಯಲು ಕರುಣಾಪೂರ್ಣ ಪ
ಬಾರೋ ನಮಿಸುವೆ ಪೂರ್ಣ ಕೃಷ್ಣಾ
ತೀರದಲಿ ಮಾಂಡವ್ಯ ಋಷಿಗಳ
ಘೋರ ತಪಸಿಗೆ ಒಲಿದು ಗುಡೆಬಲ್ಲೂರು
ಮಂದಿರನೆಂದು ಕರೆಸುತ ಅ.ಪ
ಎಲ್ಲ ಕಡೆಗೆ ನೆಲೆಸಿರುವ ಸಿರಿ
ನಲ್ಲನೊಲಿಸಲು ತಪವನು ಗೈವ
ಬಲ್ಲಿದ ಮಾಂಡವ್ಯರಿರವ ಕಂಡು
ಗೊಲ್ಲರು ಮಾಡಿದರನು ದಿನ ಶೇವಾ
ಪುಲ್ಲನಾಭನು ದರುಶನವ ಮುನಿ
ವಲ್ಲಭಗೆ ತೋರಿಸಲು ಬೇಡಿದ
ಗೊಲ್ಲರೆನ್ನಯ ಭಕುತರವರಿಂದಲ್ಲಿ
ಪೂಜೆಯಗೊಳ್ವದೆಂದನು 1
ಬಾರೊ ಬೇಗನೆ ದ್ವಿಜರಾಜ ಧ್ವಜ
ವೇರಿ ಪೊರೆದೆಯೊ ಬಂದು ಕರಿಯೆ ಕರಿ
ರಾಜ ತೋರೋ ಚವತರಣ ಸರೋಜಯುಗ್ಮ
ಸಾರಿ ಭಜಿಸುವ ಭಕುತರ ಕಲ್ಪ ಭೂಜ
ಮಾರಜನಕನೆ ಚಾರುಕನಕ ಕಿ
ರೀಟ ಕುಂಡಲಹಾರಪದಕ ಕೇಯೂರ ಸಾಲಂ-
ಕಾರ ವಪು ಶೃಂಗಾರದಲಿ ರಥವೇರಿ ಮೆರೆಯುತ 2
ವೇದವೇದ್ಯನೆ ನಿನ್ನ ಪ್ರೇಮಾ ಪಡೆದ
ಪಾದ ಮಹಿಮೆಯ ವರ್ಣಿಸಿದ
ದೇವ ಶರ್ಮಾ ಬೋಧಾದಿ ಸದ್ಗುಣಧಾಮ ಪಾಹಿ
ಮೇದಿನಿ ವಿಬುಧ ಪೂಜಿತ ಪೂರ್ಣಕಾಮ
ಮೇದಿನಿಯೊಳು ಶ್ರೀದ ನಿನ್ನಯ
ಪಾದಯುಗಳವ ಕಂಡು ಹರುಷದಿ
ಪಾದುಕೆಯ ರಚಿಸಿದಗೆ ಒಲಿದ
ಅಗಾಧ ಮಹಿಮನೆ ಮೋದಗರೆಯಲು 3
ಒಂದಿನ ನಿಶಿಯೊಳುತ್ಸವದಿ ದಣಿ
ದಂದು ಮಲಗಿರಲರ್ಚಕರು ದೇವಾಲಯದಿ
ಬಂದು ಚೋರರು ಅತಿಜವದಿ ನಿನಗೆ
ಪೊಂದಿಸಿದೊಡವೆ ಗಳನು ಚೌರ್ಯತನದಿ
ಮಂದ ಮತಿಗಳು ಒಯ್ಯುತಿರೆ ಖಳ
ವೃಂದಕಂಗಳು ಪೋಗೆ ತುತಿಸಲು
ಚಂದದಿಂ ಬರೆ ಹೇಮನಾಮವ
ಕುಂದದಲೆ ಮಾಡಿಸಿದರಾಕ್ಷಣ 4
ನೀರಜಾಸನ ಮುಖ್ಯ ತ್ರಿದಶ ಗಣದಿಂ-
ಪಂಕಜ ಭಕ್ತಪೋಷ
ಸೂರಿಜನರ ಸಹವಾಸ ಕೊಡು
ಧಾರುಣಿಯೊಳು ಕೃಷ್ಣ ತೀರನಿವಾಸ
ಬಾರೊ ನಿನ್ನನು ಶೇರಿದವರW
ವಾರಿವಾಹ ಸಮೀರ ಕಾರ್ಪರ
ನಾರ ಶಿಂಹಾತ್ಮಕನೆ ಯನ್ನಯ
ಭವ ಭಯ ದೂರಮಾಡಲು 5

ಬಾರೋ ಗುರು ರಾಘವೇಂದ್ರ ಸದ್ಗುಣಸಾಂದ್ರ ಪ
ಬಾರೋ ಸದ್ಗುರುವರ ಸಾರಿದ ಸುಜನರ
ಘೋರ ದುರಿತವ ತರಿದು ಕರುಣದಿ
ಸಾರ ಸೌಖ್ಯವಗರಿದು ಪೊರಿಯಲು ಅ.ಪ
ಸೂರಿಜನಾಲಂಕೃತ ಸುರಪುರದಿ ವಿಠ್ಠ
ಲಾರ್ಯರಿಂದಲಿ ಪೂಜಿತ ಯದುಗಿರಿಯ
ಕ್ಷೇತ್ರಾಗಾರನೆಂದೆನಿಸಿ ನಿರುತ ಭಜಕರನು ಪೊರೆಯುತ
ಸೇವೆಯನುಕೊಳ್ಳುತ
ತುರಗವನೇರಿ ಮೆರೆಯುತ1
ಭಕ್ತ್ಯಾದಿ ಫಲವೀವಂಥ ಗುರುವರನೆ ನಿಮ್ಮಯ
ಸ್ತೋತ್ರ ಪಠಣವ ಮಾಡುತ್ತ ಅನವರತ ಭಜ-
ನಾಸಕ್ತ ಜನರ ಕಾಮಿತ ನಾ ಕೊಡುವೆನೆನುತ
ಮತ್ತೆ ಎಡಬಲದಲ್ಲಿ ದ್ವಿಜಕೃತ ಛತ್ರಚಾಮರ
ವ್ಯಜನ ಸೇವಾ ನೃತ್ಯಗಾಯನ ವೈಭವದಿ ವರ
ಹಸ್ತಿವಾಹನ ವೇರಿ ಮೆರೆಯುತ 2
ಇಳಿಸುರರೊಳು ಪ್ರಖ್ಯಾತ ಲಿಂಗೇರಿ ಭೀಮಾ
ಹೊಳಿಯ ಸ್ಥಾನಕೆ ಬಂದಂಥ ಯದುಗಿರಿಯ ದ್ವಿಜವರ
ಗೊಲಿದರ್ಚನಿಯ ಗೊಂಬಂಥ ಶರ್ವಾದಿವಿನುತ
ಚಲುವ ಪ್ರಾಣನಾಥನ ಜಲಜಯುಗ ಸನ್ನಿಧಿ
ಯೊಳನುದಿನ ಪೊಳೆವ ವೃಂದಾವನದಿ ಭಕುತರಿ
ಗೊಲಿದು ಪೊರೆಯಲು ಕುಳಿತ ಯತಿವರ 3
ನಂದತೀರ್ಥರ ಸುಮತ ಸಿಂಧುವಿಗೆ ಪೂರ್ಣ
ಚಂದ್ರರೆಂದೆನಿಸಿ ದಂಥಾ ಕರ್ಮಂದಿವರ್ಯನೆ
ದುರಿತ ಘನಮಾರುತ
ವಂದೆ ಮನದಲಿ ಬಂದು ನಿಮ್ಮಡಿ
ದ್ವಂದ್ವವನು ಶೇವಿಸುವ ಶರಣರ
ವೃಂದವನು ಪಾಲಿಸಲು ಸುಂದರಸ್ಯಂದನ-
ವೇರುತಲಿ ವಿಭವದಿ 4
ನೀರಜಾಸನ ವರಬಲದಿ ಸಮರಾರೆನುತ ಬಂ-
ಗಾರ ಕಶ್ಯಪ ಪೂರ್ವದಿ ಪ್ರಹ್ಲಾದ ರಾಜಕು
ಮಾರ ನಿನ್ನೊಳು ವೈರದಿ ಹರಿಯನ್ನು ಜವದಿ
ಚಾರು ಕೃಷ್ಣಾ
ತೀರಕಾರ್ಪರ ನಾರಸಿಂಹನ ಸ್ತಂಭದಿಂದಲಿ
ತೋರಿಸಿದ ಗುರು ಸಾರ್ವಭೌಮನೆ 5

ಬಾರೋ ನೂತನ ಗೃಹಕೆ ಹರಿಯೆ ಸಿರಿ
ಮಾರುತ ಮುಖಸುರರೊಡಗೂಡಿ ಧೊರಿಯೆ ಪ
ಯಾರು ಕೇಳದಲಿಹ ಸ್ಥಳವ ನೀನೆ
ಪ್ರೇರಿಸಿ ಗೃಹವ ನಿರ್ಮಿಸಿದೆಯೋ ದೇವ
ನೂರಾರು ಪರಿರೂಪಾಂತರವ ಪೊಂದಿ
ಈ ರೀತಿ ನವಸುಸಂಸ್ಕøತವಾದ ಗೃಹವ 1
ಈರಪ್ಪÀ ಬಡಿಗನೆಂಬುವನು ಮನಿಯ
ಚಾರುತನದಲಿಂದ ನಿರ್ಮಿಸಿರುವನು
ತೋರುವ ಸಿಂಹಾಸನವನು ಮಧ್ಯಾ
ಗಾರದಿನಿನಗಾಗಿ ವಿರಿಚಿಸಿಹನು 2
ಸುತ್ತಲು ನಿರ್ಭಯವಿಹುದು ವಂ -
ಭತ್ತು ದ್ವಾರಗಳಿಂದ ಶೋಭಿಸುತಿಹುದು
ಹತ್ತಿರೆ ಗುರುಗೃಹ ವಿಹುದು ಮುಂದೆ
ಚಿತ್ತಜನಯ್ಯನ ಮಂದಿರ ವಿಹುದು 3
ಉತ್ತಮ ಗೃಹವೆನಿಸುವದು ಇ -
ಪ್ತತ್ತುನಾಲಕುವಸ್ತುಗಳಕೂಡಿಹುದು
ಸುತ್ತೇಳು ಪ್ರಾಕಾರವಿಹುದು ಸುತ್ತು
ಮುತ್ತಲು ದ್ವಿಜಜನಹೊಂದಿ ಕೊಂಡಿಹುದು 4
ಗೃಹವುನಾಲ್ಕು ವಿಧವಿಹುದು ಸೂಕ್ಷ್ಮ
ಗೃಹ ನಿನಗಾಗಿಯೆ ನೇಮಿಸಿಯಿಹುದು
ಬಹಿರದಿ ಪಾಕಗೃಹ ವಿಹುದು ಅಲ್ಲಿ
ಗೃಹಿಣಿಯಿಂ ತ್ರಿವಿಧಾನ್ನ ಪಕ್ವಗೈತಿಹುದು5
ನಡುಮನೆ ದೊಡ್ಡದಾಗಿಹುದು ಅಲ್ಲಿ
ಸಡಗರದಲಿ ಬ್ರಹ್ಮವೃಂದ ಕೂಡುವದು
ಬಿಡದೆ ಸತ್ಕಥೆನಡೆಯುವದು ಮುಂದೆ
ಪಡಸಾಲೆಯಲಿ ಸರ್ವಜನ ಸಭೆಯಹುದು 6
ಶ್ವಸನ ಮಾರ್ಗವಲಂಬಿಸಿರುವೆ ಮನಿಯ
ಹಸನ ಮೆಹದೀನಾದಿಯಿಂ ಮಾಡಿಸಿರುವೆ
ಹೊಸಸುಣ್ಣವನು ಹಚ್ಚಿಸಿರುವೆ ಏಕಾ
ದಶ ಸೇವಕರ ನಿನ್ನ ವಶದೊಳಿರುಸುವೆ 7
ನಾನಾಧನ ನಿನಗರ್ಪಿಸುವೆನು ತನು
ಮಾನಿನಿಸಹ ನಿನ್ನಾಧೀನ ಮಾಡುವೆನು
ಜ್ಞಾನಭಕ್ತಿಯೆ ಇಚ್ಛಿಸುವೆನು ನಿನ್ನ
ಧ್ಯಾನಾನಂದದಿ ಧನ್ಯನೆಂದಿನಿಸುವೆನು8
ಹರಿಯೆ ಲಾಲಿಸು ಎನ್ನ ಸೊಲ್ಲಾ ಮುಂದೀ -
ಪರಿಗೃಹದೊರೆವುದು ಸುಲಭವೇನಲ್ಲಾ
¨ರೆ ನಿನ್ನ ಬಿಡೆನೊ ಶ್ರೀ ನಲ್ಲಾ ಎನ್ನ
ಮೊರೆಯ ನಾಲಿಸಿ ನೋಡೋ ವರದೇಶವಿಠಲಾ9

ಬಾರೋ ಬಾರೋ ಮನುಕುಲಗುರುಗುಹಾ
ಸೇರಿದಾನತರ್ಗೆ ಚಾರುಸುರಭೂರುಹಪ.
ಮಾನಾಭಿಮಾನ ನಮ್ಮದು ನಿನ್ನಾಧೀನ
ದೀನಜನರ ಸುರಧೇನು ಮಹಾಸೇನ1
ಶಕ್ತಿ ಕುಕ್ಕುಟವಜ್ರಾಭಯ ಚತುರ್ಭುಜನೆ
ಭಕ್ತಿಜ್ಞಾನವನೀಯೋ ಶಂಕರಾತ್ಮಜನೆ 2
ಲಕ್ಷ್ಮೀನಾರಾಯಣನ ಧ್ಯಾನಾಭರಣ
ಸುಕ್ಷೇತ್ರಪಾವಂಜಾಧ್ಯಕ್ಷ ರವಿಕಿರಣ3

ಬಾರೋ ಬೇಗನೆ ಶ್ರೀಧರ ಗುಣಾಕರ ಪ
ಬಾರೋ ಬೇಗನೆ ಪಾದವಾರಿಜಕೆರಗುವೆ
ಚಾರು ಪರಿಯಂಕಕ್ಕೆಅ.ಪ
ಶೌರಿ ಅಗ್ರಜನಾಗಿ ಕ್ರೂರರ ಸದೆದು ಭೂ
ಭಾರವನಿಳುಹಿದ ಶೌರ್ಯದ ಮಂಚಕೆ1
ರಾಮನ ಶೇವಿಸಿ ಪ್ರೇಮವನು ಪಡೆದಂಥ
ಸೌಮಿತ್ರಿಯೆಂಬ ಸುನಾಮದ ಹಾಸಿಗೆಗೆ 2
ಸಾಸಿರವದನದಿ ಶ್ರೀಶನೆ ತವಗುಣ
ಲೇಶ ವರ್ಣಿಸುವಂಥ ಭಾಸುರ ತಲ್ಪಕೆ 3
ಇಂದಿರದೇವಿಯು ನಿಂದಿರುವಳು ತವ
ಸುಂದರ ಚರಣಾರವಿಂದವ ತೋರಿಸು 4
ಶರಣರ ಪೊರೆವ ಕಾರ್ಪರನರಶಿಂಹನೆ
ಹರಗೆ ಭೂಷಣವಾದ ಉರಗಪರ್ಯಂಕಕೆ5

ಬಾರೋ ಮನೆಗೆ ಭಾಗವತರ ಭಾಗದೇಯನೆ
ಚಾರುವದನ ತಾಮರಸವ ತೋರು ಪ್ರೀಯನೆ ಪ
ಹಗಲು ಇರುಳು ನೆನಹು ಬಿಡದು ಸುಗುಣ ಸುಂದರ
ಬಗೆಯೊಳಿನ್ನ ಮರೆಯಬಹುದೆ ನಿಗಮಗೋಚರ 1
ಕಣ್ಣಿನಿಂದ ನಿನ್ನ ನೋಡಿ ಧನ್ಯನಾಗುವೆ
ನಿನ್ನ ಚರಣಕೆನ್ನ ಶಿರದಿ ಮುನ್ನಬಾಗುವೆ 2
ನಿತ್ಯತೃಪ್ತನಿನಗೆ ನಾನೇ ಭೃತ್ಯನಾಗುವೆ
ನೃತ್ಯಗೈದು ಪಾಡಿ ಕೃತಕೃತ್ಯನಾಗುವೆ 3
ಶ್ರೀನಿವಾಸ ನಿನ್ನ ದಾಸ ನಾನೇನಲ್ಲವೆ
ಮಾನಪ್ರಾಣಗಳಿಗೆ ದೊರೆಯು ನೀನೆಯಲ್ಲವೆ 4
ಶರಣ ಜನರ ಭರಣಗೈವ ಕರುಣಿಯಾರೆಲಾ
ಹರಣ ಹರಧರದೊಳಿರುವ ವರದ ವಿಠಲಾ 5

ಬಾರೋ ವೆಂಕಟಗಿರಿನಾಥ| ದಯ-
ದೋರೈ ಭಕುತರ ಪ್ರೀತ ಪ.
ಮಾರಪಿತ ಗುಣಹಾರ ಮಂದರ-
ಧಾರ ದೈತ್ಯಸಂಹಾರ ಸುಜನೋ
ದ್ಧಾರ ಮಮಹೃದಯಾರವಿಂದಕೆ
ಬಾರೋ ಕೃಪೆದೋರೋ ವೆಂಕಟ ಅ.ಪ.
ವೃಷಭಾಸುರನೊಳು ಕಾದಿ ಸಾ-
ಹಸವ ಮೆರೆಸಿದ ವಿನೋದಿ
ವಶಗೈದು ದೈತ್ಯನ ಶಿರವ ಕತ್ತ-
ರಿಸುತಲಿ ನೀನಿತ್ತೆ ವರವ
ವಸುಧೆಯೊಳಗಿಹ ಸುಜನರನು ಮ-
ನ್ನಿಸುತಲಿಷ್ಟವನಿತ್ತು ಕರುಣಾ-
ರಸದಿ ಸಲಹುವ ಬಿಸಜನಾಭ ಶ್ರೀ-
ವೃಷಭಾಚಲವೊಡೆಯ ವೆಂಕಟ 1
ಅಂಜನೆಯೆಂಬಳ ತಪಕೆ ಭಕ್ತ-
ಸಂಜೀವನೆಂಬ ಶಪಥಕೆ
ರಂಜಿಪ ಪದವಿತ್ತೆ ಮುದದಿ ಖಿಲ-
ಭಂಜನಮೂರ್ತಿ ಕರುಣದಿ|
ಮಂಜುಳಾಂಗ ಶ್ರೀರಂಗ ಸುರವರ
ಕಂಜಭವವಿನುತಾದಿ ಮಾಯಾ-
ರಂಜಿತಾಂಘ್ರಿ ಸರೋರುಹದ್ವಯ
ಅಂಜನಾಚಲವೊಡೆಯ ವೆಂಕಟ 2
ಶೇಷನ ಮೊರೆಯ ತಾ ಕೇಳಿ ಬಲು
ತೋಷವ ಮನಸಿನೊಳ್ತಾಳಿ
ದೋಷರಹಿತನೆಂದೆನಿಸಿ ಕರು-
ಣಾಶರಧಿಯ ತಾನೆ ಧರಿಸಿ
ಶ್ರೀಶ ಹರಿ ಸರ್ವೇಶ ನತಜನ-
ಪೋಷ ದುರ್ಜನನಾಶ ರವಿಶತ-
ಭಾಸ ಕೌಸ್ತುಭಭೂಷ ವರ ಶ್ರೀ-
ಶೇಷಾಚಲವಾಸ ವೆಂಕಟ 3
ಮಾಧವವಿಪ್ರ ವಿರಹದಿ ಭ್ರಷ್ಟ
ಹೊಲತಿಗಳನು ಸೇರ್ದ ಮುದದಿ
ಸಾದರದಲಿ ನಿನ್ನ ಬಳಿಗೆ ಬರೆ
ನೀ ದಯಾನಿಧಿ ಕಂಡು ಅವಗೆ
ಶೋಧಿಸುತ ಪಾಪಗಳೆಲ್ಲವ
ಛೇದಿ ಬಿಸುಡುತ ನಿಂದು ವೆಂಕಟ-
ಭೂಧರದ ನೆಲೆಯಾದ ನಾದವಿ-
ಭೇದಬಿಂದು ಕಲಾದಿಮೂರುತಿ 4
ಧನಪತಿಯೊಳು ತಾನು ಸಾಲ ಕೊಂಡ
ಘನಕೀರ್ತಿಯಿಂದ ಶ್ರೀಲೋಲ
ವನಿತೆ ಪದ್ಮಾವತಿಪ್ರೀತ ಭಕ್ತ-
ಜನಸುರಧೇನು ಶ್ರೀನಾಥ
ವನಧಿಶಯನ ಮುರಾರಿ ಹರಿ ಚಿ-
ಧ್ವನಿನಿಭಾಂಗ ಸುಶೀಲ ಕೋಮಲ
ವನಜನಾಭ ನೀಯೆನ್ನ ಕೃಪೆಯೊಳ-
ಗನುದಿನದಿ ಕಾಯೊ ಕೃಪಾಕರ 5
ಛಪ್ಪನ್ನೈವತ್ತಾರು ದೇಶದಿಂದ
ಕಪ್ಪವಗೊಂಬ ಸರ್ವೇಶ
ಅಪ್ಪ ಹೋಳಿಗೆಯನ್ನು ಮಾರಿ ಹಣ-
ಒಪ್ಪಿಸಿಕೊಂಬ ಉದಾರಿ
ಸರ್ಪಶಯನ ಕಂದರ್ಪಪಿತ ಭಜಿ-
ಸಿರ್ಪವರ ಸಲಹಿರ್ಪ ಕುಜನರ
ದರ್ಪಹರಿಸುತ ಕಪ್ಪಕಾಣಿಕೆ
ಒಪ್ಪಿಗೊಂಬ ತಿಮ್ಮಪ್ಪಶೆಟ್ಟಿಯೆ 6
ಚಾರುಚರಣತೀರ್ಥವೀಂಟಿ ನಿನ್ನೊ-
ಳ್ಸಾರಿ ಬರುವ ಪುಣ್ಯಕೋಟಿ
ಸೇರಿದೆ ಕೊಡು ಮನೋರಥವ ಲಕ್ಷ್ಮೀ-
ನಾರಾಯಣನೆನ್ನೊಳ್ದಯವ
ತೋರು ನಿರತ ಸಮೀರಭವ ವರ-
ದಾರವಿಂದದಳಾಕ್ಷ ತಿರುಪತಿ
ವೀರ ವೆಂಕಟರಮಣ ಮದ್ಬಹು-ಭಾರ ನಿನ್ನದು ಪಾಲಿಸೆನ್ನನು 7

ಬಾರೋಮನೆಗೆ ಭಾಗವತರ ಭಾಗದೇಯನೆ
ಚಾರುವದನ ತಾಮರಸವ ತೋರು ಪ್ರೀಯನೆ ಪ
ಹಗಲುಯಿರಳು ನೆನಹುಬಿಡದು ಸುಗುಣಸುಂದರ
ಬಗೆಯೊಳೆನ್ನ ಮರೆಯಬಹುದೆ ನಿಗಮಗೋಚರ 1
ಕಣ್ಣಿನಿಂದ ನಿನ್ನ ನೊಡಿಧನ್ಯನಾಗುವೆ
ನಿನ್ನ ಚರಣಕೆನ್ನ ಶಿರದಿ ಮುನ್ನಬಾಗುವೆ 2
ನಿತ್ಯ ತೃಪ್ತನಿನಗೆ ನಾನೇ ಭೃತ್ಯನಾಗುವೆ
ನೃತ್ಯಗೈದು ಪಾಡಿಕೃತಕೃತ್ಯನಾಗುವೆ 3
ಶ್ರೀನಿವಾಸ ನಿನ್ನ ದಾಸನಾನೇನಲ್ಲವೆ
ಮಾನಪ್ರಾಣಗಳಿಗೆ ಧೊರೆಯು ನೀನೇಯಲ್ಲವೆ 4
ಶರಣ ಜನರ ಭರಣಗೈವ ಕರುಣಿಯಾರೆಲಾ
ಹರಿಣಹರಧರದೊಳಿರುವ ವರದವಿಠಲಾ 5

ಬಾಲಗೋಪಾಲನ ತೋರೆಲೆ ಲಲನೆ
ಲೀಲೆಗಳಲ್ಲಿ ಮುದದಿಂದ ಪ
ಕಾಲ ಕಳೆಯುತಿರೆ ಬಾಲೆಯರು ಕೇಳೆ
ಪೇಳದೆ ಅಗಲಿದನೆಮ್ಮ ಬಲು
ಲೋಲನಾಗಿಹನಿವನಮ್ಮ ಎಮ್ಮ
ಮೇಲೆ ಅತಿ ಕಠಿಣನಮ್ಮ ಮೋರೆ
ಕೀಳು ಮಾಡುವನಿವನಮ್ಮ ಕೋಪ
ಜ್ವಾಲೆಯಿಂದುರಿಯುವನಮ್ಮ ಬಲು
ಬಾಲನಾಗಿಹನಿವನಮ್ಮ ಗುಣ
ಶಾಲಿ ಮಾತೆಯ ಕೊಂದನಮ್ಮ ಕಪಿ
ಜಾಲದೊಳತಿ ಪ್ರಿಯನಮ್ಮ ಪರ
ಬಾಲೆಯೊಳತಿ ಮೋಹವಮ್ಮ ಮಾಯಾ
ಜಾಲವ ಬೀಸುವನಮ್ಮ ಬಲು
ಕೀಳನು ಮೇಲು ಮಾಡುವನು ಇಂಥಾ 1
ಸಾರಸಾಕ್ಷನ ವಿರಹವನು
ಸೈರಿಸಲಾರೆವೆ ಕರುಣದಲಿ ತೋರೆ
ಕೋರುವೆವು ವಿನಯದಲಿ ಅವ
ನೀರೊಳಗಡಗಿದನೇನೆ ದೊಡ್ಡ
ಮೇರು ಬುಡದಲಿಹನೇನೆ ಅವ
ಚಾರು ಸೂಕರನಾಗಿಹನೇನೆ ಅವ
ಬಾರಿ ಕಂಭದಲಿಹನೇನೆ ವೇಷ
ಧಾರಿ ಬ್ರಹ್ಮಚಾರಿಯೇನೆ ಕ್ಷಿತಿ
ಪಾರಿಯೆನಿಸಿ ತಿರುಗುವನೆ ಅವ
ಸೇರಿಹನೆ ಹನುಮನನು ಅಯ್ಯೋ
ಜಾರ ಚೋರನಿವನಮ್ಮ ಮಾನ
ಮೀರಿ ಬತ್ತಲೆ ನಿಂತಿಹನೇ ವಾಜಿ
ಏರುತ ಓಡುತಲಿಹನೇ ಇಂಥಾ 2
ವೇಣು ವಿನೋದದಿ ಕುಣಿಯುತಲಿ
ಕಾಣುವುದೆಂತು ಪ್ರಸನ್ನ ಮಾಧವನ
ಮೀನ ರೂಪವ ತಾಳಿದನ ಬಲು
ಪೀನ ಶರೀರ ಕಂಠನ ಧರೆ
ಯಾನನದಲ್ಲಿ ಪೊತ್ತಿಹನ ದುಷ್ಟ
ದಾನವನನು ಸೀಳಿದವನ ಭೂಮಿ
ದಾನವ ಯಾಚಿಸಿದವನ ಭೃಗು
ಮುನಿಯೊಳವತರಿಸಿದನ ಕಡು
ಕಾನನದೊಳು ತಿರುಗಿದನ ಸವಿ
ವೇಣು ಗಾನವ ಮಾಡಿದನ ಬಹು
ಮಾನಿನಿ ವ್ರತಗಳನಳಿದವನ ಪ್ರಸ
ನ್ನಾನನ ತುರಗವಾಹನನ 3